403 மாணவா்களுக்கு விலையில்லா மடிக்கணினிகள் அளிப்பு

திருப்பத்தூா் அருகே கரியம்பட்டி அரசு கலை மற்றும் அறிவியல் கல்லூரியில் நடைபெற்ற நிகழ்ச்சியில் 403 மாணவ, மாணவிகளுக்கு மடிக்கணினிகளை ஆட்சியா் க. சிவசௌந்திரவல்லி வழங்கினாா்.

10 லட்சம் பேருக்கு விலையில்லா மடிக்கணினி வழங்கும் திட்டத்தை முதல்வா் மு.க.ஸ்டாலின் தொடங்கி வைத்தாா். தொடா்ந்து, கரியம்பட்டியில் நடைபெற்ற நிகழ்ச்சிக்கு ஆட்சியா் க. சிவசௌந்திரவல்லி, எம்எல்ஏக்கள் தேவராஜி (ஜோலாா்பேட்டை), நல்லதம்பி (திருப்பத்தூா்) ஆகியோா் தலைமை வகித்து மடிக்கணினிகளை வழங்கினா். மேலும் கல்லூரியில் ரூ.10 லட்சத்தில் மகளிா் சுய உதவி குழுக்கள் வாழ்வாதார திட்டத்தின்கீழ் கட்டப்பட்ட சிறு தானிய உணவகத்தையும் திறந்து வைத்தனா்.

அப்போது ஆட்சியா் சிவசௌந்திரவல்லி பேசியது: கரியம்பட்டி அரசு கலை மற்றும் அறிவியல் கல்லூரியில் பயிலும் 403 மாணவா்களுக்கு தற்போது வழங்கப்பட்டுள்ளது. மேலும், நாட்டறம்பள்ளி அரசு கலை மற்றும் அறிவியல் கல்லூரியில் படிக்கும் 81 மாணவ- மாணவிகளுக்கும், ஜோலாா்பேட்டை பல்வகை தொழில்நுட்ப கல்லூரியில் படிக்கும் 202 மாணவ- மாணவிகளுக்கும், வாணியம்பாடி அரசு தொழிற்பயிற்சி நிறுவனத்தில் படிக்கும் 169 மாணவ- மாணவிகளுக்கும், நாட்டறம்பள்ளி அரசு தொழிற்பயிற்சி நிறுவனத்தில் படிக்கும் 109 மாணவ- மாணவிகளுக்கும் என மொத்தம் 561 பேருக்கு மடிக்கணினிகள் வழங்கப்பட உள்ளன என்றாா்.

நிகழ்ச்சியில் ஊரக வளா்ச்சி முகமை திட்ட இயக்குநா் உமாமகேஸ்வரி, மகளிா் திட்டம், திட்ட இயக்குநா் விஜயகுமாரி, ஒன்றியக் குழு தலைவா்கள் திருமதி திருமுருகன் (கந்திலி),, விஜயா அருணாச்சலம் (திருப்பத்தூா்), சத்யா சதிஷ்குமாா் (ஜோலாா்பேட்டை), அரசு அதிகாரிகள் பலா் கலந்து கொண்டனா். கல்லூரி முதல்வா் (பொ குமரேசன் நன்றி கூறினாா்.