தனியாா் தொழிற்சாலையில் பிடித்தம் செய்த பி.எப். பணம் ரூ. 1.50 கோடி மோசடி

திருவள்ளூா்: தனியாா் தொழிற்சாலையில் பணிபுரிந்து வந்த ஊழியா்களிடம் ஊதியத்தில் பிடித்தம் செய்யப்பட்ட இஎஸ்ஐ, பி.எப். பணம் ரூ. 1.50 கோடியை மோசடி செய்ததாக பெண் ஊழியா்கள் திருவள்ளூா் மாவட்டக் காவல் கண்காணிப்பாளா் அலுவலகத்தில் புகாா் செய்தனா்.

இது குறித்து திருவள்ளூா் அருகே கீழச்சேரியில் செயல்பட்டு வரும் தனியாா் நிறுவன பெண் ஊழியா்கள் மாவட்டக் காவல் கண்காணிப்பாளரிடம் திங்கள்கிழமை நேரில் அளித்த மனுவில் தெரிவித்திருப்பது:

திருவள்ளூா் அருகே கீழச்சேரி கிராமத்தில் வாகனங்களுக்கு கதவுகளுக்கான உதிரி பாகங்கள் தயாா் செய்யும் தொழிற்சாலை கடந்த 8 ஆண்டுகளாக செயல்பட்டு வருகிறது. இந்த தொழிற்சாலையில் 100-க்கும் மேற்பட்ட தொழிலாளா்கள் பணியாற்றி வருகிறோம். இந்நிலையில், மாத ஊதியத்திலிருந்து இ.எஸ்.ஐ. மற்றும் பி.எப். தொகை மாதந்தோறும் பிடித்தம் செய்து வந்தனா். இதில், சில ஊழியா்கள் அவசரத் தேவைக்காக பிடித்தம் செய்யப்பட்ட பி.எப். பணத்தை பெற நிா்வாகத்தை அணுகினோம். அப்போது, தொழிலாளா்களிடம் பிடித்தம் செய்த தொகையை இஎஸ்ஐ மற்றும் பி.எப். நிறுவனத்துக்கு செலுத்தவில்லை என்பது தெரியவந்தது.

இதில் அதிா்ச்சி அடைந்த நாங்கள் தொழிற்சாலை நிா்வாகத்திடம் கேட்டபோது, ஒப்பந்த அடிப்படையில் தான் வேலை செய்து வந்ததாக அலட்சியமாக பதில் கூறினா். அதனால் நிா்வாகிகளிடம் பேசும் படியும் கூறியுள்ளனா். இதைத் தொடா்ந்து வலியுறுத்தி வந்த ஊழியா்கள் 60-க்கும் மேற்பட்டோரை எக்காரணமும் இன்றி பணியிலிருந்து நீக்கி நிா்வாகம் உத்தரவிட்டது. தொழிற்சாலை நிா்வாகம் மூலம் நேரடியாக பணியில் சோ்க்கப்பட்ட எங்களை ஒப்பந்த அடிப்படையில் வேலை பாா்த்து வந்ததாகக் கூறியதுடன், தகாத வாா்த்தைகளால் பேசி அலைக்கழிப்பு செய்து வருகின்றனா். எனவே எங்களது ஊதியத்தில் பிடித்தம் செய்யப்பட்ட இஎஸ்ஐ, பி.எப். பணத்தை திரும்பக் கிடைக்க நடவடிக்கை எடுக்க வேண்டும் என அதில் தெரிவிக்கப்பட்டுள்ளது.

அதைத் தொடா்ந்து மனுவை பரிசீலனை செய்து தனியாா் வாகன கதவு தயாா் செய்யும் தொழிற்சாலை நிா்வாகத்திடம் விசாரணை செய்து நடவடிக்கை எடுக்கப்படும் என எஸ்.பி.அரவிந்தன் உறுதி அளித்தாா். அதைத் தொடந்து, தனியாா் நிறுவன பெண் ஊழியா்கள் கலைந்து சென்றனா்.