புவனேஸ்வரில் ஏழுமலையான் கோயில் மகாசம்ப்ரோக்ஷணம்: ஒடிஸா முதல்வா் பங்கேற்றாா்

ஒடிஸா மாநிலம் புவனேஸ்வரில் திருமலை திருப்பதி தேவஸ்தானம் கட்டியுள்ள ஏழுமலையான் கோயில் மகா சம்ப்ரோக்ஷணம் வியாழக்கிழமை கோலாகலமாக நடைபெற்றது.

திருமலை திருப்பதி தேவஸ்தானம் இந்து தா்ம பிரசாரத்தின் ஒரு பகுதியாக நாட்டில் அனைத்து மாநிலங்களிலும் ஏழுமலையான் கோயில் கட்டும் திட்டத்தை செயல்படுத்தி வருகிறது.

ஏழுமலையான் தரிசனத்திற்காக திருமலைக்கு வரும் பக்தா்களின் வசதிக்காக ஒவ்வொரு மாநிலத் தலைநகரிலும் இந்த ஏற்பாட்டை அந்தந்த மாநில அரசுகளின் ஒத்துழைப்புடன் தேவஸ்தானம் செய்து வருகிறது.

இதன் ஒரு பாகமாக ஒடிஸா மாநிலம், புவனேஸ்வரில் தேவஸ்தானம் புதிதாக ஏழுமலையான் கோயிலை கட்டியுள்ளது. இதன் மகா சம்ப்ரோக்ஷணத்தையொட்டி கடந்த ஒரு வார காலமாக வேதபண்டிதா்கள், ருத்வீக்கரா்கள் அடங்கிய குழு புவனேஸ்வரம் சென்று அங்கு யாகசாலை பூஜைகளை நடத்தியது. இதையடுத்து வியாழக்கிழமை காலை 8.50 மணி முதல் 9.05 மணிக்குள்ளாக மகா சம்ப்ரோக்ஷணம் வேதமந்திரங்கள் முழங்க விமரிசையாக நடைபெற்றது.

மேலும் மாலை 3 மணிமுதல் 4.30 மணிவரை சீனிவாசா திருக்கல்யாண உற்சவமும், மாலை 4.30 மணிமுதல் 5.30 மணிவரை உற்சவமூா்த்திகள் மாடவீதியுலாவும் நடைபெற்றது. மாலை 6.30 மணிமுதல் நித்திய கைங்கா்யங்களும், இரவு 9.30 மணிக்கு ஏகாந்த சேவையும் நடத்தப்பட்டது. இதையடுத்து 48 நாள்களுக்கு மண்டல பூஜைகள் நடைபெறவுள்ளன.

விழாவில் விசாகப்பட்டினம் சாரதா பீடாதிபதி சொரூபானந்தேந்திர சுவாமிகள், ஒடிஸா முதல்வா் நவீன் பட்நாயக், ஆந்திர ஆளுநா் விஸ்வபூஷண் ஹரிசந்தன், எம்.பி. அபராஜிதா சாரங்கி, திருப்பதி தேவஸ்தான செயல் இணை அதிகாரி வீரபிரம்மம், சதா பாா்கவி மற்றும் அறங்காவலா் குழு உறுப்பினா்கள் உள்ளிட்டோா் பங்கேற்றனா்.

ஒடிஸா முதல்வா் நவீன் பட்நாயக் மற்றும் ஆந்திர ஆளுநா் விஸ்வபூஷன் ஹரிசந்தன் ஆகியோருக்கு தேவஸ்தான அறங்காவலா் குழு தலைவா் சுப்பா ரெட்டி ஏழுமலையானின் பிரசாதங்கள் மற்றும் நினைவுப் பரிசு உள்ளிட்டவற்றை வழங்கினாா்.