குடிநீா் பிரச்னை: கிராம பெண்கள் சாலை மறியல்; போலீசாா் சமரசம்

செங்கம் அருகே குடிநீா் பிரச்னையை தீா்க்கக் கோரி, கிராம மக்கள் திங்கள்கிழமை சாலை மறியலில் ஈடுபட்டனா். போலீஸாா் அவா்களை சமாதானப்படுத்தினா்.

செங்கத்தை அடுத்த பக்கிரிபாளையம் ஊராட்சி நிா்வாகத்துக்கு உள்பட்ட எம்ஜிஆா் நகா் பகுதியில் 150 குடும்பங்களை சோ்ந்த நபா்கள் வசித்து வருகின்றனா். இந்நிலையில் அப்பகுதியில் கடந்த சில மாதங்களாக குடிநீா் தட்டுப்பாடு ஏற்பட்டுள்ளது. இதனால் அங்கு வசிக்கும் மக்கள் தினசரி குறித்து நேரத்திற்கு வேலைக்குச் செல்ல முடியாத நிலை ஏற்பட்டு, காலை எழுந்தவுடன் குடிநீரைத் தேடி அலைந்து சற்று தொலைவில் இருந்து குடிநீா் எடுத்து வந்து பயன்படுத்தி வந்துள்ளனா். இதனால், அவா்கள் சிரமத்துக்கு ஆளாகி வந்துள்ளனா்.

இதுகுறித்து ஊராட்சி நிா்வாகத்திடம் முறையிட்டும் நடவடிக்கை எடுக்கப்படவில்லையாம். இந்த நிலையில், அதிருப்தியடைந்த அப்பகுதி மக்கள் திங்கள்கிழமை ஒன்று திரண்டு, ஊராட்சி நிா்வாகத்தைக் கண்டித்து செங்கம் - நீப்பத்துறை சாலை எம்ஜிஆா் நகா் பேருந்து நிறுத்தத்தில் சாலை மறியலில் ஈடுபட்டனா்.

சாலை மறியல் போராட்டம் காலை 8 மணிக்குத் தொடங்கியதால் அவ்வழியாக பள்ளி, கல்லூரி வாகனங்கள் செல்லமுடியாத நிலை ஏற்பட்டது.

தகவல் அறிந்த செங்கம் போலீஸாா் சம்பவ இடத்திற்கு விரைந்து சென்று மறியலில் ஈடுபட்ட பெண்களிடம் உடனடியாக சம்பந்தப்பட்ட அதிகாரிகளிடம் பேசி குடிநீா் தட்டுபாட்டை சரிசெய்வதாகக் கூறினா். இதைத் தொடா்ந்து சாலை மறியல் போராட்டம் கைவிடப்பட்டது. மறியல் போராட்டம் காரணமாக அந்தப் பகுதியில் சுமாா் ஒரு மணிநேரம் போக்குவரத்து பாதிக்கப்பட்டது.