குளத்தின் பராமரிப்புப் பணியை மேற்கொள்ள அனுமதி கோரி மனு

குடியாத்தம் ராபின்சன் குளத்தில் பராமரிப்புப் பணியை மேற்கொள்ள அனுமதி வழங்குமாறு ரோட்டரி சங்கம் சார்பில் மாவட்ட ஆட்சியரிடம் கோரிக்கை மனு அளிக்கப்பட்டது. குப்பை மேடாக இருந்த ராபின்சன் குளம் ரூ. 2.85 கோடியில் அண்மையில் சீரமைக்கப்பட்டது.

இதையடுத்து, கடந்த மாதம் 27-ஆம் தேதி தமிழக முதல்வர் ஜெயலலிதா காணொலிக் காட்சி மூலம் அதைத் திறந்து வைத்தார்.

குளத்தைச் சுற்றி பொதுமக்கள் நடைப்பயிற்சி மேற்கொள்ள நடைபாதை, பூங்கா உள்ளிட்ட பொழுதுபோக்கு அம்சங்கள் அமைக்கப்பட்டன.

இந்நிலையில் குடியாத்தம் ரோட்டரி சங்கம் சார்பில், ராபின்சன் குளத்தின் பராமரிப்புப் பணியை மேற்கொள்ள அனுமதி வழங்குமாறு மாவட்ட ஆட்சியர் இரா.நந்தகோபாலிடம், ரோட்டரி தலைவர் ஜே.கே.என்.பழனி வெள்ளிக்கிழமை கோரிக்கை மனு அளித்தார். அப்போது, இதுகுறித்து பரிசீலிப்பதாக ஆட்சியர் கூறினார்.