இலவச சிறப்பு சித்த மருத்துவ முகாம்

தமிழக முன்னாள் சட்டத்துறை அமைச்சரும், காட்பாடி தொகுதியின் முன்னாள் எம்எல்ஏவுமான எம். ஏ.ஜெயவேலு நினைவு நாளையொட்டி, சிறப்பு இலவச சித்த மருத்துவ முகாம் சேர்க்காடு அரசினர் மேல்நிலைப் பள்ளியில் ஞாயிற்றுக்கிழமை நடைபெற்றது. 
முகாமுக்கு, சத்துவாச்சாரி இம்ப்காப்ஸ் அமைப்பின் இயக்குநர் கே.பி.அருச்சுணன் தலைமை வகித்தார். ஜெ.புரட்சிதாசன் முகாமைத் தொடங்கி வைத்தார். எம்.ஏ.ஜெயவேலுவின் மனைவி பாக்யா ஜெயவேலு மருத்துவ மூலிகைக் கண்காட்சியைத் திறந்து வைத்தார். 
முகாமில், சேர்க்காடு அரசு மேல்நிலைப் பள்ளியின் குடிநீர் பயன்பாட்டுக்காக புதிய மின் மோட்டாரை கே. பி. அருச்சுணன் வழங்க, அதை பள்ளித் தலைமை ஆசிரியர் எம்.சைமன் பெற்றுக் கொண்டார். தொடர்ந்து, கே.பி.அருச்சுனன் தலைமையில் மருத்துவர்கள் பி.செல்வம் உள்ளிட்ட  மருத்துவக் குழுவினர் பொதுமக்களுக்கு நாடி பரிசோதனை செய்து பல்வேறு நோய்களுக்கு இலவச சித்த மருந்துகளையும், மருத்துவ ஆலோசனைகளையும் வழங்கினர்.  
இதில், மகளிருக்கான மருத்துவம், மருத்துவ ஆலோசனைகளும், எலும்பு முறிவு சிகிச்சை பிரிவில் மூட்டு நழுவுதல், எலும்பு முறிவு ஆகியவற்றிற்கு கட்டுபோட்டு சிகிச்சை  அளிக்கப்பட்டன. இந்த முகாமில் 700-க்கும் மேற்பட்ட நோயாளிகள் பயன்பெற்றனர்.  நிகழ்ச்சியில், சேர்க்காடு முன்னாள் ஊராட்சித் தலைவர் எஸ்.எம். லோகநாதன், அரசுப் பள்ளி பெற்றோர்-ஆசிரியர் சங்கத் தலைவர் ஜெ.கிருபாகரன், எராந்தாங்கல்  முன்னாள் ஊராட்சித் தலைவர் பி.சக்திவேல் உள்ளிட்டோர் பங்கேற்றனர்.