டீசல் விலையேற்றத்துக்கு எதிர்ப்பு: வேலூரில் "ரிக்' லாரி உரிமையாளர்கள் வேலைநிறுத்தம்

டீசல் விலையேற்றத்துக்கு எதிர்ப்பு தெரிவித்து வேலூரில் ரிக் லாரி உரிமையாளர்கள் புதன்கிழமை முதல் காலவரையற்ற வேலைநிறுத்தத்தில் ஈடுபட்டுள்ளனர். மேலும், பெட்ரோல், டீசல் விலையேற்றத்தை அடுத்து ஆழ்துளைக் கிணறு அமைப்பதற்கான கட்டணத்தையும் உயர்த்தி அறிவித்துள்ளனர்.
வேலூர் மாவட்டம் முழுவதும் 100-க்கும் மேற்பட்ட ரிக் லாரிகள் உள்ளன. இவை மாவட்டத்தின் பல்வேறு பகுதிகளில் மட்டுமன்றி பிற மாவட்டங்கள், அண்டை மாநிலங்களிலும் ஆழ்துளைக் கிணறுகள் அமைக்கும் பணியில் ஈடுபட்டுள்ளன. ஆழ்துளைக் கிணறு அமைக்கும் பணியில் ஈடுபடும் ரிக் லாரிகளுக்கு அதிக அளவில் டீசல் தேவைப்படுகிறது. சமீப காலமாக டீசல் விலை வேகமாக உயர்ந்து வருவதால், ரிக் லாரி உரிமையாளர்கள் கடும் நெருக்கடிக்கு தள்ளப்பட்டுள்ளனர்.
இதையடுத்து டீசல் விலை உயர்வுக்கு எதிர்ப்பு தெரிவித்தும், அதன் விலையைக் குறைக்கக் கோரியும் புதன்கிழமை முதல் காலவரையற்ற வேலைநிறுத்தத்தில் ஈடுபட்டுள்ளனர். இதையடுத்து ஆழ்துளைக் கிணறுகள் அமைக்கும் பணிகளில் ஈடுபடாமல் அனைத்து ரிக் லாரிகளும் ஆங்காங்கே நிறுத்தி வைக்கப்பட்டுள்ளன. இதனால், புதிதாக வீடு கட்டுபவர்களும், விளை நிலங்களில் விதை விதைத்து நீராதாரத்துக்காக ஆழ்துளைக் கிணறுகள் அமைக்க காத்திருப்பவர்களும் பெருமளவில் பாதிக்கப்பட்டுள்ளனர்.
இதுகுறித்து வேலூர் வட்ட ரிக் உரிமையாளர்கள் சங்கத் தலைவர் ஆர்.பிரபு கூறியதாவது: கடுமையான டீசல் விலையேற்றத்தால் ஏற்கெனவே ஆழ்துளை கிணறு அமைக்கத் தேவையான பிட், குழாய்களின் விலை பெருமளவில் உயர்ந்துள்ளது. குறிப்பாக, ஒரு ஆழ்துளைக் கிணறு அமைக்கத் தேவையான பிட்களின் விலை ரூ. 18 ஆயிரத்திலிருந்து ரூ. 25 ஆயிரமாகவும், குழாய்களின் விலை ரூ. 2,700-லிருந்து ரூ. 3,900 ஆகவும்வும், ஆயில் விலை லிட்டர் ரூ. 80-லிருந்து ரூ. 150ஆகவும் உயர்ந்துள்ளது. ஆனால், ஆழ்துளைக் கிணறுகள் அமைப்பதற்கான கட்டணம் மட்டும் உயர்த்தப்படாமல் அதே நிலையில் உள்ளது. இதனால், ரிக் உரிமையாளர்கள் கடுமையான நெருக்கடிகளுக்கு தள்ளப்பட்டுள்ளோம்.
டீசல் விலையேற்றத்துக்கு எதிர்ப்பு தெரிவித்து புதன்கிழமை முதல் காலவரையற்ற வேலைநிறுத்தம் மேற்கொண்டுள்ளோம். 5 நாள்களுக்குப் பிறகு சங்கக் கூட்டம் நடத்தி வேலைநிறுத்தத்தைத் தொடர்வது குறித்து மீண்டும் முடிவு செய்யப்படும். இதனிடையே, டீசல் விலையேற்றத்தைக் கருத்தில் கொண்டு ஆழ்துளைக் கிணறு அமைக்கும் கட்டணம் ஒரு அடி ரூ. 70-லிருந்து ரூ. 88-ஆக உயர்த்தப்பட்டுள்ளது. இந்தக் கட்டணத்தை பின்பற்றாதவர்களுக்கு ரூ. 20 ஆயிரம் அபராதம் விதிக்கவும், அபராதத்தைக் கட்டத்தவறினால் ஒரு வார காலம் சம்பந்தப்பட்ட உரிமையாளரின் ரிக் லாரியை சிறைபிடிக்கவும் முடிவு செய்யப்பட்டுள்ளது என்றார் அவர்.