பல ஆண்டு காலமாக இருந்த சலுகைகள் ரத்து:  தோட்டத் தொழிலாளர்கள் எதிர்ப்பு

பல ஆண்டு காலமாக இருந்த சலுகைகளை ரத்து செய்ததால் கருமலை எஸ்டேட்  தொழிலாளர்கள் எதிர்ப்பு தெரிவித்துள்ளனர்.
வால்பாறை பகுதியில் தனியார் எஸ்டேட் நிர்வாகத்தினருக்கு சொந்தமான தேயிலைத் தோட்டங்களில் பல ஆயிரக்கணக்கான தொழிலாளர்கள் பணியாற்றி வருகின்றனர். இதில், பல ஆண்டு காலமாகப் பணியாற்றும் தொழிலாளர்கள் ஏராளமானேர் உள்ளனர். தொழிலாளர்களின் ஆயுள் காப்பீடு, தபால் நிலையத்தில் உள்ள மாத சேமிப்புக் கணக்கு, வருங்கால வைப்பு நிதி, குடியிருப்புக்கு வழங்கப்பட்டுள்ள கேபிள் இணைப்பு உள்ளிட்டவைகளுக்கு செலுத்த வேண்டிய தொகை மாதந்தோறும் தொழிலாளர்களுக்கு வழங்கப்படும் சம்பளத்தில் பிடித்தம் செய்யப்படுகிறது. 
பின்னர் இத்தொகையை நிர்வாகத்தினர் அந்தந்தத் துறைக்குச் செலுத்தி வருவது பல ஆண்டுகளாக நடைமுறையில் உள்ளது. இந்நிலையில், வால்பாறையில் உள்ள கருமலை  குரூப் எஸ்டேட்களில் பணியாற்றும் தொழிலாளர்கள் மற்றும் அலுவலர்களுக்கான இந்தச்  சலுகைகளை கடந்த மாதம் முன் அறிவிப்பின்றி எஸ்டேட் நிர்வாகத்தினர் நிறுத்தியுள்ளனர். இந்தச் செயலால் பாதிப்படைந்துள்ள தொழிலாளர்கள் அதற்கு எதிர்ப்பு தெரிவித்திருப்பதுடன் தொழிற்சங்கத் தலைவர்கள் மற்றும் தொழிலாளர் துறை அதிகாரிகளுக்கும் புகார் தெரிவித்துள்ளனர்.