ஈமு கோழி நிறுவனம் நடத்தி ரூ.4.32 கோடி மோசடி: பெண் போலீஸ் உள்பட மூவருக்கு10 ஆண்டுகள் சிறை

ஈமு கோழி நிறுவனம் நடத்தி ரூ.4.32 கோடி செய்த பெண் போலீஸ் உள்பட மூவருக்குத் தலா 10 ஆண்டுகள் சிறைத் தண்டனையும், ரூ.2.15 கோடி அபராதமும் விதித்து கோவையில் உள்ள தமிழ்நாடு முதலீட்டாளா் நல பாதுகாப்பு சிறப்பு நீதிமன்றம் (டான்பிட்) வெள்ளிக்கிழமை உத்தரவிட்டது.

ஈரோடு மாவட்டம், கோபிச்செட்டிபாளையம் அருகே உள்ள ஜோதி நகரைச் சோ்ந்தவா் காா்த்திக் சங்கா் (44). இவரது மனைவி காயத்ரி ஸ்ரீ காா்த்திக் (42). இவா், கோபிசெட்டிபாளையத்தில் காவலராகப் பணியாற்றி வந்தாா். இத்தம்பதியினா், கோபிசெட்டிபாளையத்தில் கடந்த 2010ஆம் ஆண்டு ‘கே.ஜி. பிரைட் லைவ் ஸ்டாக் இந்தியா பிரைவேட் லிமிடெட்’ என்ற பெயரில் நிறுவனம் ஒன்றைத் தொடங்கினா். இந்நிறுவனத்தில் சபின் கண்ணா என்பவா் மேலாளராகப் பணியாற்றி வந்தாா்.

இவா்கள் மூவரும் சோ்ந்து பொதுமக்களைக் கவரும் வகையில் திட்டம் ஒன்றில் ரூ. 2 லட்சம் முதலீடு செய்தால் அதற்கு ஒரு ஷெட் அமைத்துக்கொடுத்து முதலீட்டாளா்களுக்கு 20 ஈமுக் கோழிகள், அதற்குத் தேவையான தீவனங்கள் மற்றும் மருந்துகள் கொடுப்பதாகவும், மேலும் மாதந்தோறும் பராமரிப்புத் தொகையாக முதலீட்டாளா்களுக்கு ரூ. 7 ஆயிரம் கொடுப்பதாகவும் ஆண்டு முடிவில் ஊக்கத்தொகையாக ரூ.20 ஆயிரம் தருவதாகவும் உறுதி அளித்தனா்.

இதேபோல ரூ. 2.5 லட்சம், ரூ. 3 லட்சம், ரூ. 5 லட்சம் என பல்வேறு திட்டங்களை உருவாக்கி மக்களிடம் விளம்பரம் செய்தனா். இதை நம்பிய பலா் அவா்களிடம் லட்சக்கணக்கில் பணம் செலுத்தினா். பணத்தைப் பெற்றுக்கொண்ட இவா்கள் பலருக்கு ஈமு கோழி குஞ்சுகளையும், விளம்பரத்தில் குறிப்பிட்ட வட்டியையும் கொடுக்கவில்லை.

இதையடுத்து பணம் முதலீடு செய்தவா்கள், ஈரோடு மாவட்ட பொருளாதார குற்றப் பிரிவு போலீஸாரிடம் புகாா் அளித்தனா். அதன்பேரில் போலீஸாா் வழக்குப் பதிவு செய்து காா்த்திக் சங்கா், காயத்ரி ஸ்ரீ காா்த்திக், சபின் கண்ணா ஆகிய மூவரையும் 2012ஆம் ஆண்டு கைது செய்தனா். இவா்களிடம் நடத்தப்பட்ட விசாரணையில் இவா்கள் 98 பேரிடம் ரூ.4 கோடியே 32 லட்சத்து 35 ஆயிரம் மோசடி செய்திருப்பது தெரியவந்தது.

இந்த வழக்கு கோவையில் உள்ள டான்பிட் நீதிமன்றத்தில் விசாரிக்கப்பட்டு வந்தது. விசாரணை முடிவில் குற்றம் நிரூபிக்கப்பட்டதையடுத்து, காா்த்திக் சங்கா், காயத்ரி ஸ்ரீ காா்த்திக், சபின் கண்ணா ஆகிய மூவருக்கும் தலா 10 ஆண்டுகள் சிறைத் தண்டனையும், மூவருக்கும் சோ்த்து ரூ. 2 கோடியே 15 லட்சத்து 60 ஆயிரம் அபராதமும் விதித்தும் நீதிபதி ஏ.எஸ்.ரவி வெள்ளிக்கிழமை தீா்ப்பளித்தாா். இதில் பாதிக்கப்பட்டவா்களுக்கு ரூ.2 கோடியே 14 லட்சத்தை இழப்பீடாக வழங்கவும் தீா்ப்பில் குறிப்பிட்டுள்ளாா்.