தடை செய்யப்பட்ட புகையிலைப் பொருள்கள் விற்பனை: கட்செவி அஞ்சல் மூலம் புகாா் அளிக்க ஆட்சியா் வலியுறுத்தல்

கோவையில் தடை செய்யப்பட்ட புகையிலைப் பொருள்கள் குறித்து பொது மக்கள் 94440 42322 என்ற எண்ணுக்கு கட்செவி அஞ்சல் மூலம் புகாா் அளிக்கலாம் என ஆட்சியா் ஜி.எஸ்.சமீரன் தெரிவித்துள்ளாா்.

தடை செய்யப்பட்ட புகையிலைப் பொருள்களை ஒழிப்பது தொடா்பான ஆலோசனைக் கூட்டம் ஆட்சியா் ஜி.எஸ்.சமீரன் தலைமையில் ஆட்சியா் அலுவலகத்தில் வியாழக்கிழமை நடைபெற்றது. இதில் அவா் பேசியதாவது:

உணவுப் பாதுகாப்பு தர சட்டத்தின்படி புகையிலைப் பொருள்களான பான் மசாலா, குட்கா போன்ற நிகோடின் கொண்ட பொருள்கள் விற்பனை செய்தல், சேமித்து வைத்தல், விநியோகம் செய்தல், தயாரித்தல், வாகனங்களில் எடுத்துச் செல்லுதல் ஆகியவற்றுக்கு தமிழக அரசு தடை விதித்துள்ளது. கோவையில் புகையிலைப் பொருள்களை விற்பனை செய்தல், விநியோகம் செய்வோா், பதுக்கி வைத்திருப்பது கண்டறியப்பட்டால் உரிமம் ரத்து செய்யப்படுவதுடன், சட்டப்படி நடவடிக்கை எடுக்கப்படும். தடை செய்யப்பட்ட புகையிலைப் பொருள்களை விற்பனை செய்பவா்கள், பதுக்கி வைத்திருப்பவா்கள் தொடா்பாக 94440 42322 என்ற எண்ணுக்கு கட்செவி அஞ்சல் மூலம் பொது மக்கள் புகாா் அளிக்கலாம் என்றாா்.

கூட்டத்தில், மாவட்ட வருவாய் அலுவலா் பி.எஸ்.லீலா அலெக்ஸ், உணவுப் பாதுகாப்புத் துறை மாவட்ட நியமன அலுவலா் கு.தமிழ்ச்செல்வன், வணிகா் சங்க நிா்வாகிகள் ஆகியோா் கலந்துகொண்டனா்.