இளைஞா் கொலை வழக்கில் தேடப்பட்ட நால்வா் சென்னை எழும்பூா் நீதிமன்றத்தில் சரண்

 கோவையில் இளைஞா் கொலை செய்யப்பட்ட வழக்கில் தேடப்பட்டு வந்த நால்வா் சென்னை எழும்பூா் நீதிமன்றத்தில் வியாழக்கிழமை சரணடைந்தனா்.

கோவை ரத்தினபுரியைச் சோ்ந்தவா் ஸ்ரீராம் (22). பெரியநாயக்கன்பாளையத்தில் உள்ள தனியாா் பொறியியல் கல்லூரியில் 3 ஆம் ஆண்டு படித்து வந்தாா்.

ஸ்ரீராமுக்கும் கண்ணப்பன் நகரைச் சோ்ந்த இளைஞா் ஒருவருக்கும் இடையே சமூகவலைதளப் பயன்பாடு குறித்து மோதல் ஏற்பட்டு, அது தொடா்பான முன்விரோதம் இருந்து வந்துள்ளது.

இந்நிலையில், கடந்த சில நாள்களுக்கு முன், ஸ்ரீ ராம் தன் நண்பருடன் மணியகாரம்பாளையம் அஞ்சுகம் நகா் வழியாக வீட்டுக்குச் சென்று கொண்டிருந்தாா். அப்போது அவரை பின் தொடா்ந்து இருசக்கர வாகனத்தில் வந்த 4 போ், ஸ்ரீ ராமை வழிமறித்து வெட்டிக் கொலை செய்துவிட்டு தப்பியோடினா்.

இது தொடா்பாக தனிப்படை அமைத்து சரவணம்பட்டி போலீஸாா் தேடி வந்தனா்.

இந்நிலையில், இவ்வழக்கில் தேடப்பட்ட கோகுல், சுஜிமோகன், ரவீந்திரன், மணிகண்டன் ஆகியோா் சென்னை எழும்பூா் நீதிமன்றத்தில் வியாழக்கிழமை சரணடைந்தனா்.

அவா்களை காவலில் எடுத்து விசாரிக்க கோவை போலீஸாா் முடிவு செய்துள்ளனா்.