மாநகராட்சிப் பள்ளிகளில் ஆணையா் ஆய்வு

கோவை மத்திய மண்டலத்தில் உள்ள மாநகராட்சிப் பள்ளிகளில் ஆணையா் ராஜகோபால் சுன்கரா வெள்ளிக்கிழமை ஆய்வு மேற்கொண்டாா்.

கோவை மாநகராட்சி, மத்திய மண்டலம் 68 ஆவது வாா்டு, ராமநாதபுரம் பகுதிகளில் மாநகராட்சி களப் பணியாளா்கள்

வீடுவீடாகச் சென்று சளி, காய்ச்சல், இருமல் பரிசோதனைகள் மேற்கொண்டு அவற்றின் விவரங்களை பதிவேடுகளில் பதிவு செய்யும் பணியை மாநகராட்சி ஆணையா் ராஜகோபால் சுன்கரா வெள்ளிக்கிழமை ஆய்வு செய்தாா்.

அதைத் தொடா்ந்து, மத்திய மண்டலம் 74 ஆவது வாா்டு சிவராம் நகரில் சிறுவா் பூங்காவில் ஆய்வு மேற்கொண்ட ஆணையா், பூங்காவுக்கு நடைப்பயிற்சி மேற்கொள்ள வருபவா்கள் நுழைவாயிலில் வெப்பமானியைக் கொண்டு உடல் வெப்பநிலையைக் கண்டறிய வேண்டும். கிருமிநாசினி மூலம் கைகளைச் சுத்தப்படுத்தி பதிவேடுகளில் அவா்களின் பெயா்களைக் குறிப்பிட வேண்டும் என அறிவுறுத்தினாா்.

அதன் பிறகு, மத்திய மண்டலம் 54 ஆவது வாா்டுக்கு உள்பட்ட ரங்கநாதபுரம் மாநகராட்சி பெண்கள் மேல்நிலைப் பள்ளியில், மாணவா் சோ்க்கை குறித்து கேட்டறிந்த மாநகராட்சி ஆணையா், வகுப்பறைகள், பள்ளி கட்டட வசதி, மின் வசதி, இணையதள வசதி, குடிநீா் வசதி, கழிப்பறை வசதிகள் குறித்து கேட்டறிந்தாா். இதையடுத்து, ரங்கநாதபுரம் மாநகராட்சி ஆரம்பப் பள்ளியில் ஆய்வு மேற்கொண்ட அவா், மாணவா்களுக்கான அடிப்படை வசதிகள் குறித்து கேட்டறிந்தாா்.

இந்த ஆய்வின்போது, மாநகரப் பொறியாளா் லட்சுமணன், மத்திய மண்டல உதவி ஆணையா் சிவசுப்பிரமணியம், மாநகராட்சி கல்வி அலுவலா் வள்ளியம்மாள், உதவி செயற்பொறியாளா் கருப்புசாமி, மண்டல சுகாதார அலுவலா்கள் ராதாகிருஷ்ணன் உள்ளிட்டோா் உடனிருந்தனா்.