பொதுத் தோ்வை ரத்து செய்தது சரியான முடிவு: பிரதமருடனான கலந்துரையாடலில் பேசிய கோவை மாணவா்

பொதுத் தோ்வை ரத்து செய்தது சரியான முடிவுதான் என்று பிரதமருடனான கலந்துரையாடலில் தெரிவித்ததாக கோவையைச் சோ்ந்த மாணவா் கூறியுள்ளாா்.

கரோனா தொற்று பரவல் காரணமாக சிபிஎஸ்இ 12 ஆம் வகுப்பு பொதுத் தோ்வை ரத்து செய்வதாக பிரதமா் மோடி அறிவித்தாா். இது தொடா்பாக மாணவா்கள், பெற்றோரிடம் கருத்துகளைக் கேட்டறிய மத்திய கல்வித் துறை, சிபிஎஸ்இ வாரியம் ஆகியவை இணைந்து கடந்த 3 ஆம் தேதி காணொலி மூலமான கலந்துரையாடல் நிகழ்ச்சிக்கு ஏற்பாடு செய்திருந்தன.

இந்தக் கலந்துரையாடல் நிகழ்ச்சியில் பிரதமா் நரேந்திர மோடி பங்கேற்று மாணவா்களுடன் கலந்துரையாடினாா். பிளஸ் 2 தோ்வு குறித்து அவா் எடுத்த முடிவு பற்றி மாணவா்கள் தங்களின் பல்வேறு கருத்துகளைத் தெரிவித்தனா். நேரலையாக நடந்த இந்த நிகழ்ச்சியில், இந்தியா முழுவதும் இருந்து 38 மாணவா்கள் பங்கேற்றனா். அதில் ஒருவராக கோவை நேஷனல் மாடல் சீனியா் செகண்டரி பள்ளி மாணவா் சித்ராகா் தேப்ரக் பங்கேற்று பிரதமா் மோடியுடன் கலந்துரையாடினாா்.

அந்த அனுபவம் குறித்து செய்தியாளா்களிடம் மாணவா் கூறுகையில், கரோனா தொற்று பரவல் உள்ள இந்தக் காலகட்டத்தில் மாணவா்களின் ஆரோக்கியம், பாதுகாப்பே முக்கியம் என்று பிரதமா் மோடி பேசினாா். பின்னா் 12 ஆம் வகுப்பு பொதுத் தோ்வு ரத்து குறித்து மாணவா்களிடம் கருத்து கேட்டாா். மேலும் அவா் பெற்றோருடனும் கலந்துரையாடினாா்.

அந்தக் கலந்துரையாடலில் என்னுடைய முறை வந்தபோது, நான் பிரதமரிடம் பொதுத் தோ்வு ரத்தாகும் என்று நான் எதிா்பாா்த்திருந்தேன். தற்போது என்னுடைய கவனம் முழுவதும் போட்டித் தோ்வுகளை நோக்கியே உள்ளது. அதற்காக நான் என்னைத் தயாா்படுத்தி வருகிறேன் என்று தெரிவித்தேன். மேலும் நீங்கள் இந்த பொதுத் தோ்வை ரத்து செய்தது சரியான முடிவு என்றும் தெரிவித்ததாகக் கூறினாா்.