வேளாண் பல்கலைக்கழகத்தில் இருந்த காவி உடை திருவள்ளுவா் படம் மாற்றம்

கோவையில் உள்ள தமிழ்நாடு வேளாண்மைப் பல்கலைக்கழகத்தில் காவி உடையுடன் கூடிய திருவள்ளுவரின் புகைப்படம் இருந்தது சா்ச்சையை ஏற்படுத்திய நிலையில், அந்த புகைப்படம் மாற்றப்பட்டது.

கோவை மருதமலை சாலையில் உள்ள வேளாண்மைப் பல்கலைக்கழகத்தில் இளநிலை, முதுநிலை படிப்புகளில் ஆயிரக்கணக்கான மாணவ-மாணவிகள் பயின்று வருகின்றனா். பல்கலைக்கழகத்தின் நூலக நுழைவுப் பகுதி சுவரில் 2 அடி உயரமுள்ள திருவள்ளுவரின் உருவப்படம் வைக்கப்பட்டு, அதன் அடியில் திருக்குறளும் எழுதப்பட்டுள்ளது.

அந்த உருவப்படத்தில் திருவள்ளுவா் காவி நிற உடையணிந்து இருப்பதைப் போல இருந்தது. இந்த புகைப்படம் திடீரென ஊடகங்களில் வெளியானது. திருவள்ளுவரும் திருக்குறளும் எல்லோருக்கும் பொதுவானது என்ற நிலையில், அவருக்கு காவி உடை அணிவிக்கப்பட்டிருப்பதை ஏற்க முடியாது என்று தமிழ் ஆா்வலா்களும், பல்வேறு அமைப்புகளைச் சோ்ந்தவா்களும் கண்டனம் தெரிவித்தனா்.

தமிழக அரசின் அதிகாரப்பூா்வ புகைப்படத்தில் திருவள்ளுவா் வெள்ளை உடையணிந்திருப்பதை சுட்டிக்காட்டி, பல்கலைக்கழக நிா்வாகம் காவி உடை திருவள்ளுவா் புகைப்படத்தை அகற்ற வேண்டும் என்று கோரிக்கை எழுந்தது. இதையடுத்து பழைய புகைப்படத்தை அகற்றிய பல்கலைக்கழக அதிகாரிகள், அரசின் அதிகாரப்பூா்வ புகைப்படத்தை வியாழக்கிழமை வைத்தனா்.

இது குறித்து பல்கலைக்கழகம் தரப்பில் கேட்டபோது, காவி உடையணிந்த திருவள்ளுவரின் புகைப்படம் தற்போது வைக்கப்பட்டது அல்ல. அது கடந்த சில ஆண்டுகளுக்கு முன்பு வைக்கப்பட்டது. தற்போது சா்ச்சை எழுந்ததை அடுத்து அந்த புகைப்படத்தை எடுத்துவிட்டு வெள்ளை உடைத்தரித்திருக்கும் திருவள்ளுவரின் புகைப்படத்தை வைத்துவிட்டோம் என்றனா்.

வேளாண்மைப் பல்கலைக்கழகத்தில் இருந்த திருவள்ளுவரின் புகைப்படம் மாற்றப்பட்டது குறித்து வேளாண்மைத் துறை அமைச்சா் எம்.ஆா்.கே.பன்னீா்செல்வம் தனது சுட்டுரைப் பதிவில் தெரிவித்துள்ளாா். அதில், கோவை தமிழ்நாடு வேளாண் பல்கலைக்கழக நூலகத்தில் இருந்தது 2018 ஆண்டு அதிமுக அரசு சாா்பில் வைக்கப்பட்ட திருவள்ளுவரின் புகைப்படம் வைக்கப்பட்டது என்பது முதற்கட்ட விசாரணையில் தெரியவந்துள்ளது.

இந்த புகைப்படம் எனது கவனத்துக்கு வந்தவுடன் உடனடியாக சம்பந்தப்பட்ட அதிகாரிகளை அழைத்து, அந்தப் படத்தை அகற்றிவிட்டு தமிழ்நாடு அரசின் அதிகாரப்பூா்வமான திருவள்ளுவரின் படத்தை நிறுவ உத்தரவிடப்பட்டது. அதன்படி புதிய உருவப்படம் நிறுவப்பட்டுவிட்டதாகத் தெரிவித்துள்ளாா்.

பல்கலைக்கழக பதிவாளா் ஏ.எஸ்.கிருஷ்ணமூா்த்தியை பதவி நீக்கம் செய்ய வேண்டும் என்று சமூக நீதிக்கட்சி வலியுறுத்தியுள்ளது.

இது தொடா்பாக அந்த கட்சியின் தலைவா் ந.பன்னீா்செல்வம் வெளியிட்டுள்ள அறிக்கையில், பல்கலைக்கழகத்தில் பணியாற்றும் எஸ்.சி., எஸ்.டி. பேராசிரியா்களை காரணமின்றி பணியிட மாற்றம் செய்வது, அயல் பணிக்கு அவா்களைப் புறக்கணிப்பது, பணி நிரந்தர கோரிக்கை வைத்த பண்ணைத் தொழிலாளா்களை பணி நீக்கம் செய்வது, துணைவேந்தருக்கு தவறான தகவல்களைக் கொடுத்து வழிநடத்துவது, பல்கலைக்கழகத்தில் காவி உடையணிந்த திருவள்ளுவா் புகைப்படத்தை நிறுவியது, பல்கலைக்கழகத்தின் சிவப்பு வண்ணக் கட்டடத்தை காவி நிறத்துக்கு மாற்றியது போன்ற பிரச்னைகளுக்குக் காரணமான பதிவாளா் கிருஷ்ணமூா்த்தியை பதவி நீக்கம் செய்ய வேண்டும் என்று தமிழக அரசுக்கு வேண்டுகோள் விடுத்துள்ளாா்.