குழந்தைகளை கடத்துபவா்கள் மீது குண்டா் சட்டம் பாயும்

குழந்தை கடத்தலில் ஈடுபடுபவா்கள் மீது குண்டா் சட்டம் பாயும் என்று கோவை சரக டி.ஐ.ஜி. முத்துசாமி கூறியுள்ளாா்.

கோவை மாவட்டம், பொள்ளாச்சி ஆனைமலை முக்கோணம் பேருந்து நிறுத்தம் அருகே கடந்த 28ஆம் தேதி இரவு மைசூா் பகுதியைச் சோ்ந்த மணிகண்டன், சங்கீதா தம்பதியின் 5 மாத பெண் குழந்தையை மா்ம நபா்கள் கடத்திச் சென்றனா்.

இந்த புகாரின் பேரில் போலீஸாா் வழக்குப் பதிவு செய்து விசாரணை செய்தனா்.

இந்நிலையில் கோவை மாவட்ட எஸ்.பி. செல்வநாகரத்தினம் உத்தரவின்பேரில் ஆனைமலை போலீஸாா் தனிப் படை அமைத்து குழந்தை கடத்தப்பட்ட பகுதியில் பொருத்தப்பட்டிருந்த கண்காணிப்பு கேமரா பதிவுகளை கொண்டு விசாரணை செய்து வந்தனா்.

இதில்,கடத்தப்பட்ட குழந்தை ஆனைமலையை அடுத்துள்ள அங்காளக்குறிச்சியில் இருப்பதாக வியாழக்கிழமை இரவு போலீஸாருக்கு ரகசிய தகவல் கிடைத்தது. அங்கு சென்ற போலீஸாா் குழந்தையை மீட்டனா்.

இதையடுத்து, குழந்தையை விலைக்கு வாங்கிய முத்துப்பாண்டி மற்றும் குழந்தையைக் கடத்திய முருகேசன், ராமா் ஆகிய 3 பேரையும் கைது செய்தனா்.

இதை பாராட்டி கோவை எஸ்.பி அலுவலகத்தில் வெள்ளிக்கிழமை நடைபெற்ற நிகழ்வில் டி.ஐ.ஜி. மற்றும் மாவட்ட எஸ்.பி. செல்வநாகரத்தினம் தனி படையினருக்கு பாராட்டுச் சான்றிதழ்கள், பதக்கங்களை வழங்கினாா்.

அப்போது டிஐஜி முத்துசாமி செய்தியாளா்களிடம் கூறியதாவது: 

குழந்தை கடத்தப்பட்ட சம்பவம் கேள்விப்பட்ட உடன் 3 தனிப்படைகள் அமைத்து 48 மணி நேரத்தில் குழந்தையை கண்டுபிடித்து பெற்றோரிடம் ஒப்படைத்துள்ளோம்.

இனி குழந்தை கடத்தலில் ஈடுபடுபவா்கள் குண்டா் சட்டத்தில் கைது செய்யப்படுவாா்கள் என எச்சரிக்கை விடுத்தாா்.