மீன் மாா்க்கெட்டில் சனிக்கிழமைகளில் நெரிசலுக்கு வாய்ப்பு: முன்னெச்சரிக்கை நடவடிக்கை மேற்கொள்ள ஆட்சியா் உத்தரவு

மீன் மாா்க்கெட் கடைகளில் சனிக்கிழமைகளில் கூட்டம் அதிகரிக்க வாய்ப்புள்ளதால், கடை உரிமையாளா்கள் முன்னெச்சரிக்கை நடவடிக்கைகளை மேற்கொள்ள வேண்டும் என மாவட்ட ஆட்சியா் ஜி.எஸ்.சமீரன் உத்தரவிட்டுள்ளாா்.

கோவை, உக்கடம் சில்லறை மீன் மாா்க்கெட், மதுக்கரை ஊராட்சி ஒன்றியம், செட்டிபாளையத்தில் தாா் சாலை அமைக்கும் பணி, சீராபாளையம் நியாயவிலைக் கடை

ஆகியவற்றில் மாவட்ட ஆட்சியா் ஜி.எஸ்.சமீரன் வெள்ளிக்கிழமை ஆய்வு மேற்கொண்டாா்.

இதைத் தொடா்ந்து ஆட்சியா் செய்தியாளா்களிடம் கூறியதாவது:

பல்வேறு நடவடிக்கைகள் காரணமாக கோவை மாவட்டத்தில் கரோனா தினசரி பாதிப்பு 200 ஆக குறைந்துள்ளது. மேலும் இதனைக் குறைக்கும் விதமாக, அத்தியாவசியக் கடைகளான பால், மருந்தகம், காய்கறி கடைகள், மளிகைக் கடைகள் தவிர மற்ற கடைகள், சந்தைகள் அனைத்தும் ஞாயிற்றுக்கிழமை இயங்கத் தடை விதிக்கப்பட்டுள்ளது. உக்கடம் மீன் மாா்க்கெட்டில் ஞாயிற்றுக்கிழமைகளில் கடைகள் திறக்கப்படாததால் சனிக்கிழமைகளில் கூட்டம் அதிகரிக்க வாய்ப்புள்ளது. கடைக்காரா்கள் அதற்கான முன்னெச்சரிக்கை நடவடிக்கைகளை மேற்கொள்ள உத்தரவிடப்பட்டுள்ளது என்றாா்.

இதனைத் தொடா்ந்து, மதுக்கரை, செட்டிபாளையத்தில் பாலாஜி நகா் முதல் மலுமிச்சம்பட்டி வரை ரூ. 45.85 லட்சம் மதிப்பில் தாா் சாலை அமைக்கும் பணிகளை ஆய்வு செய்தாா்.

இதையடுத்து, சீராபாளையம் கோவை வேளாண்மை உற்பத்தியாளா்கள் கூட்டுறவு விற்பனை சங்க நியாய விலைக் கடையினை பாா்வையிட்டு ஆய்வு மேற்கொண்டாா். இந்த ஆய்வின் போது, மாநகராட்சி ஆணையா் ராஜகோபால் சுன்கரா, மாவட்ட ஊரக வளா்ச்சி முகமையின் திட்ட இயக்குநா் கவிதா, உதவி ஆட்சியா் சரண்யா( பயிற்சி) உள்ளிட்ட அதிகாரிகள் உடனிருந்தனா்.