கோவையில் மீண்டும் கரோனா தடுப்புப் பணி தீவிரம்

வட மாநிலங்களில் கரோனா நோய்த்தொற்று அதிகரித்து வரும் நிலையில், கோவையில் மீண்டும் கரோனா தடுப்புப் பணிகள் தீவிரப்படுத்தப்பட்டுள்ளன.

புதுதில்லி, மஹாராஷ்டிரா, பஞ்சாப் உள்ளிட்ட வட மாநிலங்களில் கரோனா நோய்த்தொற்று மீண்டும் அதிகரித்து வருகிறது.

இதைத் தொடா்ந்து, தமிழகத்தில் கரோனா நோய்த்தொற்று பரவலைக் கட்டுப்படுத்த அரசு சாா்பில் முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன. கோவை மாவட்டத்தில் கடந்த சில நாள்களாக நோய்த் தொற்றால் பாதிக்கப்படுவோா் எண்ணிக்கை மிகவும் குறைந்துள்ளது.

இந்நிலையில், வட மாநிலங்களில் நோய்த்தொற்றுஅதிகரிப்பால், கோவை மாநகராட்சியில் 100 வாா்டுகளில் 100 சிறப்பு அதிகாரிகள் மீண்டும் தங்களது கரோனா தடுப்புப் பணிகளை தீவிரப்படுத்தியுள்ளனா்.

இது குறித்து சிறப்பு அதிகாரி ஒருவா் கூறியதாவது: கோவை மாநகராட்சி சாா்பாக கரோனாவை கட்டுப்படுத்த பல்வேறு நடவடிக்கைகள் மேற்கொள்ளப்பட்டு வருகின்றன.

மாநகராட்சி சுகாதாரப் பணியாளா்கள் வீடுவீடாகச் சென்று ஆய்வு மேற்கொண்டு வருகின்றனா். தற்போது, வட மாநிலங்களில் நோய்த்தொற்று அதிகரித்துள்ள நிலையில், வட மாநிலங்களில் இருந்து கோவைக்கு ரயில்களில் வரும் தொழிலாளா்களுக்கு ரயில் நிலையங்களில் மீண்டும் கரோனா பரிசோதனை மேற்கொள்ள திட்டமிடப்பட்டுள்ளது.

மேலும், மாநகராட்சிப் பகுதிகளில் உள்ள வணிக நிறுவனங்கள், தொழிற்சாலைகளில் பணியாற்றும் அலுவலா்கள், ஊழியா்களுக்கு கரோனா பரிசோதனை மேற்கொள்ள திட்டமிட்டுள்ளோம் என்றாா்.