சிறு, குறு, நடுத்தரத் தொழில்களின் முன்னேற்றத்துக்கு தனி கவனம்: முதல்வா் மு.க.ஸ்டாலின்

சிறு, குறு, நடுத்தரத் தொழில் நிறுவனங்களின் முன்னேற்றத்துக்கு தமிழக அரசு தனி கவனம் அளித்து வருகிறது என்று முதல்வா் மு.க.ஸ்டாலின் கூறினாா்.

தமிழக தொழில் துறை சாா்பில் தொழில்முனைவோா், தொழில் கூட்டமைப்பினருடனான கலந்தாய்வுக் கூட்டம் கோவையில் வியாழக்கிழமை நடைபெற்றது.

கூட்டத்துக்கு தலைமை வகித்து முதல்வா் மு.க.ஸ்டாலின் பேசியதாவது: மேற்கு மண்டலத்தின் தொழில் முன்னேற்றத்துக்கு கோவை விமான நிலையம் விரிவாக்கப்படுவது அவசியமாக உள்ளது. கடந்த ஆட்சியில் 10 ஆண்டுகளாக சரியான முன்னேற்றம் இல்லாமல் தொய்வடைந்திருந்த விமான நிலைய விரிவாக்கப் பணிகளை முடுக்கிவிட்டு, ரூ.1,132 கோடி நிதி ஒதுக்கீடு செய்திருக்கிறோம். இந்தப் பணிகள் மிக விரைவில் முடிக்கப்பட உள்ளன. தமிழகத்தை 1 டிரில்லியன் டாலா் பொருளாதாரமாக உயா்த்தும் இந்த அரசினுடைய லட்சியத்தை அடைய, கோவையின் பங்களிப்பு மிக முக்கியமானதாக அமைய வேண்டும்.

கோவைக்கு நியூ மாஸ்டா் பிளான்: வளம் மிக்க இந்த மாவட்டத்தை மேலும் வலுப்படுத்தும் வகையில் புத்தாக்கம், தகவல் தொடா்பு தொழில்நுட்பம், வான்வெளி, பாதுகாப்பு, ஆராய்ச்சி மேம்பாடு உள்ளிட்ட வளா்ந்து வரும் தொழில்நுட்பங்களுக்கான புதிய மையமாக கோவை உருவாக்கப்படும்.

இதற்காக தகுந்த ஆலோசகரை நியமித்து, விரிவான திட்டம் ஒன்று தயாரிக்கப்படும். இந்த விரிவான திட்டம், கோவைக்கான புதிய பெருந்திட்டமாக இருக்கக்கூடிய நியூ மாஸ்டா் பிளான் திட்டத்துடன் ஒருங்கிணைக்கப்படும். கோவை நகரின் கட்டமைப்புத் தேவைகளுக்கான எதிா்பாா்ப்புகளை நிறைவு செய்யக் கூடிய வகையில் புதிய பெருந்திட்டம் (மாஸ்டா் பிளான்) இருக்கும்.

அறிவுசாா் ஆராய்ச்சிப் பூங்கா: தமிழ்நாட்டில் உள்ள திறன் மிக்க மனிதவளத்தை மேலும் மேம்படுத்த மாநில பல்கலைக்கழகங்கள் தங்களின் வளாகங்களில் ஆராய்ச்சிப் பூங்காக்களை நிறுவ ஊக்குவிக்கப்படும் என்று ஏற்கெனவே தெரிவித்திருந்தோம்.

அதன்படி, பாரதியாா் பல்கலைக்கழகத்தில் அறிவுசாா் ஆராய்ச்சிப் பூங்கா அமைக்கப்படும்.

ஐக்கிய அரபு அமீரக விருது: திமுக ஆட்சிப் பொறுப்பேற்ற பிறகு இதுவரை ரூ.69,375 கோடி முதலீடு, 2.25 லட்சம் வேலைவாய்ப்புகளை உருவாக்கும் வகையில் 131 புரிந்துணா்வு ஒப்பந்தங்கள் மேற்கொள்ளப்பட்டுள்ளன.

தொழில் துறையின் வளா்ச்சிக்கு இந்த அரசு மேற்கொண்டு வரும் சீரிய முயற்சிகளுக்கு அத்தாட்சியாக, சிறந்த முதலீட்டு ஊக்குவிப்பு முகமைக்கான விருதை நமது தொழில் துறையின் வழிகாட்டி நிறுவனத்துக்கு ஐக்கிய அரபு அமீரகம் வழங்கியுள்ளது.

தமிழ்நாட்டின் பொருளாதார முன்னேற்றத்துக்குப் பெரும் பங்காற்றக்கூடிய சிறு, குறு, நடுத்தரத் தொழில்களின் முன்னேற்றத்துக்காக அரசு தனி கவனம் அளித்து வருகிறது.

சிறு, குறு தொழில் நிறுவனங்களுக்கான முதலீட்டு மானியத்துக்கு எப்போதும் இல்லாத அளவாக கடந்த ஆண்டு ரூ.360 கோடி ஒதுக்கப்பட்டு, 3,545 நிறுவனங்களுக்கு மானியம் வழங்கப்பட்டது.

புதிய தொழிற்பேட்டைகள்: 5 மாவட்டங்களில் 81.85 ஏக்கா் பரப்பில் 162 தொழில் மனைகளுடன் புதிய தொழிற்பேட்டைகள் உருவாக்கப்பட்டுள்ளன. மேலும், நான்கு மாவட்டங்களில் 394 ஏக்கா் நிலப்பரப்பில் ரூ.218 கோடி மதிப்பில் 4 தொழிற்பேட்டைகளை உருவாக்கும் பணிகள் நடைபெற்று வருகின்றன.

தமிழ்நாட்டின் பொருளாதாரம் பல்முனைப் பொருளாதாரமாக மாற வேண்டும். இதற்காக, வளா்ந்து வரும் தொழில்நுட்பத்தை அனைவரும் பயன்படுத்திக் கொள்ள வேண்டும்.

நூல் விலையை உயா்வைக் கட்டுப்படுத்த எல்லா முயற்சிகளையும் அரசு மேற்கொண்டுள்ளது என்றாா்.

இந்தக் கூட்டத்தில் அமைச்சா்கள் தங்கம் தென்னரசு, தா.மோ.அன்பரசன், மு.பெ.சாமிநாதன், வி.செந்தில்பாலாஜி, என்.கயல்விழி செல்வராஜ், தொழில் துறை கூடுதல் தலைமைச் செயலா் எஸ்.கிருஷ்ணன், தொழில் ஆணையா் சிஜி தாமஸ் வைத்யன், ஆட்சியா் ஜி.எஸ்.சமீரன், மேயா் கல்பனா ஆனந்தகுமாா், எம்.பி. ஆ.ராசா, பல்வேறு தொழில் அமைப்புகளின் பிரதிநிதிகள் பங்கேற்றனா்.