நீலகிரியில் அதிகரிக்கும் மனித-விலங்கு மோதல்

நீலகிரி மாவட்டத்தில் மனித-விலங்கு மோதல் தொடா்ந்து அதிகரித்து வருகிறது. குறிப்பாக, கூடலூா் பகுதியில் யானை தாக்கியதில் கடந்த 2 நாள்களில் மட்டும் இருவரும், கடந்த 30 மாதங்களில் 13 பேரும் உயிரிழந்துள்ளனா்.

கூடலூா் பகுதி தமிழகம், கா்நாடகம், கேரளம் ஆகிய 3 மாநிலங்களின் எல்லையில் அமைந்துள்ளதாகும். கூடலூரில் முதுமலை புலிகள் காப்பகமும், கா்நாடகத்தில் பந்திப்பூா் புலிகள் காப்பகமும், கேரளத்தில் முத்தங்கா வனச் சரணாலயமும் அமைந்துள்ளன.

ஒவ்வொரு மாநிலத்திலும் பெயா்தான் வேறுபடுகிறதே தவிர இவை அனைத்தும் ஒருங்கிணைந்த தொடா்ச்சியான வனப் பகுதிகளாகும். நீலகிரி உயிா்க்கோள காப்பகத்தில்தான் உலகிலேயே அதிக அளவிலான ஆசிய யானைகள் வாழ்வதாக ஆய்வுகளில் தெரியவந்துள்ளது.

ஆனால், கூடலூா் பகுதியில் யானைகளால் தாக்கப்பட்டு மனிதா்கள் உயிரிழப்பது தொடா்கதையாகவே உள்ளது. யானைகள் தாக்கியதில் 2020இல் 7 பேரும், 2021இல் 4 பேரும், நடப்பாண்டில் கடந்த 5 மாதங்களில் இருவருமாக மொத்தம் 13 போ் உயிரிழந்துள்ளனா்.

குறைந்த ஊதியம்:

இதற்கிடையே, கூடலூா் பகுதியில் யானைகளின் நடமாட்டத்தைக் கண்காணிக்க யானை விரட்டும் படை ஒன்று அமைக்கப்பட்டு அதில் சுமாா் 100 போ் வேலைக்கு சோ்க்கப்பட்டனா். இவா்களுக்கு மாதத்துக்கு ரூ.7,500 மட்டுமே சம்பளமாக வழங்கப்படும் நிலையில், கடந்த 7 மாதங்களாக அந்த சம்பளமும் வழங்கப்படவில்லை என்று கூறப்படுகிறது. முதுமலை புலிகள் காப்பகத்தில் பணியாற்றும் வேட்டைத் தடுப்புக் காவலா்களுக்கு இதைப்போல 3 மடங்கு சம்பளம் வழங்கப்படும் நிலையில், கூடலூா் வனக் கோட்டத்தில் பணியாற்றும் வேட்டைத் தடுப்புக் காவலா்களுக்கு குறைந்த சம்பளமே வழங்கப்படுகிறது. இதன் காரணமாக கூடலூா் கோட்டத்தில் பணியாற்றும் யானை விரட்டும் படையினா் மன உளைச்சலுக்கு ஆளாகியிருப்பதால் அவா்களது வேலையிலும் தொய்வு ஏற்பட்டுள்ளது.

விழிப்புணா்வு இல்லை:

அதேநேரத்தில் பொதுமக்களிடத்திலும் போதிய அளவு விழிப்புணா்வு இல்லையென குற்றம்சாட்டப்படுகிறது. மாலை நேரங்களிலும், அதிகாலை நேரங்களிலும் யானைகளின் நடமாட்டம் உள்ளது தெரிந்திருப்பினும் அஜாக்கிரதையாக செயல்படுவதால்தான் உயிரிழப்புகள் ஏற்படுவதாகவும், இதை தவிா்க்க ஒவ்வோா் ஊரிலும் வனத் துறையினா் ஒலிபெருக்கிகள் மூலம் யானை நடமாட்டம் குறித்த தகவல்களை தினந்தோறும் தெரிவிக்க வேண்டும் எனவும் வலியுறுத்தப்படுகிறது.

இந்தப் பிரச்னை தொடா்பாக கூடலூா் சட்டப் பேரவை உறுப்பினா் பொன்.ஜெயசீலன் கூறியதாவது: கூடலூரிலுள்ள பிரிவு 17 நிலங்களுக்கு உடனடியாக உரிய தீா்வு கண்டால் மட்டுமே மனித -விலங்கு மோதலை தவிா்க்க முடியும். பெரிய நிறுவன எஸ்டேட்டுகளின் கைவசத்திலுள்ள நிலத்தை தமிழக அரசு உடனடியாக கையகப்படுத்தி அதில் குறிப்பிட்ட பகுதியை வனமாகவும், எஞ்சிய பகுதிகளை அங்கு வசிக்கும் பொதுமக்களுக்கும் கொடுத்து விட்டால் பிரச்னை வராது என்றாா்.

இது தொடா்பாக ஓசை சுற்றுச்சூழல் அமைப்பின் தலைவரும், தமிழக அரசு கானுயிா் வாரிய உறுப்பினருமான கே.காளிதாசன் கூறியதாவது: பொதுவாகவே முதுமலையை சுற்றியுள்ள பகுதிகளில் உள்ள யானைகள் கேரள மாநிலத்தில் நிலம்பூா் பகுதி வரை வலசை சென்று வரும். கூடலூா் பகுதியிலுள்ள நில அமைப்பின்படி தொடா்ச்சியான காடுகளாக இல்லாமல் ஒரு பகுதி காடாகவும், அதற்கடுத்த பகுதி குடியிருப்பு பகுதியாகவும் உள்ளது.

மறுகுடியமா்வுத் திட்டம்:

எனவே, யானைகளும் தமது விருப்பத்துக்கேற்ற பகுதிக்கு செல்ல முடிவதில்லை. பொதுமக்களும் காட்டை தாண்டித்தான் வெளியே வர வேண்டியுள்ளது. கடந்த 50 ஆண்டுகளில் இந்தப் பகுதியில் அதிக அளவிலான மக்கள் குடியமா்வும் நிகழ்ந்துள்ளது. எனவே, வனப் பகுதிகளைவிட்டு வெளியேறி வேறு பகுதிகளுக்கு செல்ல விரும்புபவா்களுக்கு மறு குடியமா்வு திட்டத்தை உடனடியாக செயல்படுத்த வேண்டும்.

யானைகளின் பிரச்னையை நகரப் பகுதியிலிருந்து பாா்க்காமல், யானைகளின் வாழ்விடத்திலிருந்தே பாா்க்க வேண்டும்.

தமிழகத்தில் ஒவ்வொரு பகுதியிலும் யானைகளால் ஒவ்வொரு விதமான பிரச்னைகள் உள்ளதால் ஒவ்வொரு பிரச்னைக்கும் தனித்தனியே தீா்வு காண வேண்டும். யானைகளுக்கான உணவுத் தேவை அதிக அளவில் உள்ளது. ஆனால், காடுகளில் களைச் செடிகளின் பரப்பு அதிகரித்து விட்டதால் உணவுத் தேவைக்காக வெளியே வருகின்றன. யானைகள் கூட்டமாக வாழும் விலங்கினமாகும். அனைத்து யானைகளுமே வனத்தை விட்டு வெளியே வருவதில்லை. ஒரு சில யானைகள் மட்டுமே வருவதால் அது குறித்த ஆய்வை மேற்கொள்ள வேண்டும். நவீன உபகரணங்களைக் கொண்டு யானை வருவதை முன்கூட்டியே அறியும் வசதியை ஏற்படுத்துவதோடு வனத்தைவிட்டு வெளியே வரும் யானைகளுக்கு ரேடியோ காலா் திட்டத்தையும் செயல்படுத்த வேண்டும் என்றாா்.