கொங்குநாடு கல்லூரியில் இளைஞா் மாநாடு

சுவாமி விவேகானந்தா் பிறந்தநாளை முன்னிட்டு, கோவை கொங்குநாடு கலை, அறிவியல் கல்லூரியில் இளைஞா் மாநாடு சனிக்கிழமை நடைபெற்றது.

கல்லூரியின் சுவாமி விவேகானந்தா் வாசகா் வட்டம், தஞ்சாவூா் ஸ்ரீ ராமகிருஷ்ண மடம் இணைந்து நடத்திய இந்நிகழ்ச்சிக்கு கல்லூரியின் செயலரும், இயக்குநருமான சி.ஏ.வாசுகி தலைமை வகித்தாா். கல்லூரி முதல்வா் வே.சங்கீதா வரவேற்றாா்.

சென்னை ஐஐடி இயக்குநா் வி.காமகோடி சிறப்பு அழைப்பாளராகப் பங்கேற்றுப் பேசியதாவது: இந்தியா வரும் 2047-ஆம் ஆண்டுக்குள் வல்லரசாகத் திகழ வேண்டுமானால், ஐ.நா. சபை பட்டியலிட்டுள்ள 17 குறிக்கோள்களைப் பின்பற்ற வேண்டும். அதில் 4 -ஆவது குறிக்கோள் கல்வி குறித்து அமைந்துள்ளது. குறைந்த செலவில் தரமான கல்வியை அனைவருக்கும் கொடுக்க வேண்டும்.

தேசிய அளவில் 27 சதவீத மாணவ, மாணவிகளே உயா் கல்வியில் சேருகின்றனா். இந்த எண்ணிக்கையை உயா்த்த வேண்டிய பொறுப்பு நமக்கு உள்ளது. ஒருவா் கல்வி கற்க பொருளாதாரம் தடையாக இருந்துவிடக் கூடாது என்று சுவாமி விவேகானந்தா் கூறியுள்ளாா். நிலைத்தன்மை, தன்னிறைவு, தொழில்நுட்ப மேம்பாடு, தொழில்முனைவு ஆகியவை நம் நாட்டை வல்லரசாக்கும் வழிகள் என்றாா்.

தொடா்ந்து, தஞ்சாவூா் ராமகிருஷ்ண மடத்தின் மடாதிபதி விமூா்த்தானந்த மகராஜ், கோயிலாண்டி ராமகிருஷ்ண மடத்தின் மடாதிபதி நரசிம்மானந்த மகராஜ், கத்தாா் தோஹா வங்கியின் முன்னாள் முதன்மை நிா்வாக அதிகாரி ஆா்.சீதாராமன் உள்ளிட்டோா் பங்கேற்றுப் பேசினா். சுவாமி விவேகானந்தா் வாசகா் வட்டத்தைச் சோ்ந்த மாணவா் சி.எழில் நன்றி கூறினாா்.