இரு சக்கர வாகன சாகச ரீல்ஸ் வெளியிட்டவா் கைது

கோவை மாநகரின் பிரதான பகுதியான அவிநாசி சாலையில் பொதுமக்களை அச்சுறுத்தல் வகையில் அதிவேகமாக இருசக்கர வாகனத்தை ஓட்டி, சாகசங்களை ரீல்ஸ் எடுத்து இன்ஸ்டாகிராமில் வெளியிட்ட இளைஞரை போலீஸாா் கைது செய்தனா்.

கோவை மாநகா், பேரூா் காளம்பாளையம் திருவள்ளுவா் வீதியைச் சோ்ந்தவா் தனபால் மகன் ரஞ்சித்குமாா் (20). இவா் கடந்த 27-ஆம் தேதி இரவு 10 மணி அளவில் அவிநாசி சாலையில் ஹோப் காலேஜ் முதல் கோல்ட்வின்ஸ் வரை தனது இருசக்கர வாகனத்தில் போக்குவரத்து விதிகளை மீறி அதிவேகமாகச் சென்றுள்ளாா்.

மேலும், பொதுமக்களுக்கு அச்சுறுத்தல் ஏற்படுத்தும் வகையில் வாகனத்தின் முன்பக்க சக்கரத்தைத் தூக்கி ‘வீலிங்’ உள்ளிட்ட ஆபத்தான சாகசங்களைச் செய்துள்ளாா். அந்த சாகசக் காட்சிகளை விடியோவாக எடுத்து சமூக வலைதளங்களில் ரீல்ஸ் ஆக பதிவேற்றம் செய்துள்ளாா்.

இதுகுறித்து தகவல் அறிந்த பீளமேடு காவல் உதவி ஆய்வாளா் தினேஷ்குமாா், தாமாக முன்வந்து வழக்குப் பதிவு செய்தாா். ஆபத்தான முறையில் வாகனம் ஓட்டுதல் உள்ளிட்ட சட்டப் பிரிவுகளின் கீழ் ரஞ்சித்குமாரை போலீஸாா் கைது செய்தனா்.