திமுக சார்பில்  பாடல் ஒப்பித்தல் போட்டி

ஈரோட்டில் திமுக சார்பில் மாவட்ட அளவிலான பாடல் ஒப்பித்தல் போட்டி ஞாயிற்றுக்கிழமை நடைபெற்றது.
 அண்ணா பிறந்த நாளையொட்டி, ஈரோடு தெற்கு மாவட்ட திமுக, மாநகர இலக்கிய அணி சார்பில், மணல்மேட்டில் உள்ள கட்சி அலுவலகத்தில் மாவட்ட அமைப்பாளர் இளஞ்செழியன் தலைமையில் நடைபெற்ற பாவேந்தர் பாரதிதாசன் பாடல் ஒப்பித்தல் போட்டியை, தெற்கு மாவட்ட செயலாளர் சு.முத்துசாமி தொடக்கிவைத்தார். 
 இதில், ஈரோடு மாவட்டத்தைச் சேர்ந்த பள்ளி, கல்லூரி மாணவ, மாணவிகள் 150 க்கும் மேற்பட்டோர் கலந்துகொண்டு பாடல்களை ஒப்பித்தனர். அதைத் தொடர்ந்து, வெற்றி பெற்ற மாணவ, மாணவிகளுக்கு முதல் பரிசாக ரூ. 5 ஆயிரமும், 2 ஆவது பரிசாக ரூ. 3 ஆயிரமும், 3 ஆவது பரிசாக ரூ. 2 ஆயிரமும் வழங்கப்பட்டது. மேலும், முதலிடம் பிடித்தவர்கள் சென்னையில் நடைபெற உள்ள மாநில அளவிலான போட்டிகளில் கலந்துகொள்ள உள்ளனர்.
 இதில், மாநில நெசவாளர் அணி செயலாளர் சச்சிதானந்தம், மாவட்ட பொருளாளர் பழனிசாமி, துணைச் செயலாளர் சின்னையன், இளைஞர் அணி அமைப்பாளர் பிரகாஷ் உள்ளிட்டோர் பங்கேற்றனர்.