ஜவுளித் துறையில் நவீன வளர்ச்சிக்கான படைப்பாற்றல் போட்டிகள்

சித்தோடு அருகே உள்ள எல்லீஸ்பேட்டை பாரதிதாசன் கலை, அறிவியல் கல்லூரியின் ஆடை வடிவமைப்பு, கவின் புனைவியல் சார்பில், சுற்றுச்சூழலுக்கு ஏற்ற ஜவுளித் துறையில் தொழில்நுட்ப வளர்ச்சிக்கான கருத்தரங்கம், கல்லூரிகளுக்கு இடையிலான படைப்பாற்றலுக்கான போட்டிகள் புதன்கிழமை நடைபெற்றன. 
இந்நிகழ்ச்சிகளுக்கு, பாரதிதாசன் கல்வி நிறுவனத் தலைவர் என்.கே.கே.பெரியசாமி தலைமை வகித்தார். வணிகவியல் துறைத் தலைவர் எஸ்.அருள்ராஜ் நிகழ்ச்சியைத் தொடக்கி வைத்தார். கல்லூரிப் பொருளாளர் வி.ஆர்.முருகன், இணைச் செயலர்கள் வசந்தி சத்யன், பரிமளா ராஜா ஆகியோர் வாழ்த்துரை வழங்கினர். கல்லூரியின் ஆடை வடிவமைப்புத் துறைத் தலைவர் ஆர்.கீதாதேவி வரவேற்றார். 
சிறப்பு விருந்தினராக திருப்பூர் சிக்கன்னா கல்லூரியின் ஆடை வடிவமைப்பு, கவின் புனைவியல் துறைப் பேராசிரியர் எஸ்.கற்பகம் சின்னம்மாள் பங்கேற்று, தற்போதைய ஆடை வடிவமைப்புத் துறையின் வளர்ச்சி, நவீனம் குறித்து சிறப்புரையாற்றினார்.
இந்நிகழ்ச்சியில், 10 க்கும் மேற்பட்ட கல்லூரிகளிலிருந்து பேராசிரியர்கள், 100 க்கும் மேற்பட்ட மாணவ, மாணவியர் பங்கேற்றனர். துணைப் பேராசிரியர்கள் சி.திவ்யா, எஸ்.பி.மைதிலி உள்ளிட்டோர் கலந்துகொண்டனர்.