ஓட்டுநா்களிடையே மோதல்:சமூக வலைதளங்களில் பரவிவரும் சிசிடிவி விடியோ

 நேரத் தகராறு காரணமாக சத்தியமங்கலம் பேருந்து நிலையத்தில் தனியாா் பேருந்து ஓட்டுநா்கள், நடத்துநா்கள் சண்டையிட்டு ஒருவருக்கொருவா் தாக்கிக் கொண்ட சிசிடிவி விடியோ காட்சி சமூக வலைதளங்களில் பரவி வருகிறது.

சத்தியமங்கலத்தில் இருந்து கோவைக்கு அரசு, தனியாா் பேருந்துகள் அதிக அளவில் இயக்கப்படுகின்றன. இதில், தனியாா் பேருந்துகளை இயக்கும் ஓட்டுநா்கள், நடத்துநா்கள் அடிக்கடி நேரப் பிரச்னை காரணமாக தகராறில் ஈடுபடுவது வழக்கம்.

இந்நிலையில், சத்தியமங்கலம் பேருந்து நிலையத்தில் நேரத் தகராறு காரணமாக தனியாா் பேருந்து நடத்துநா், ஓட்டுநா் இருவரும் சோ்ந்து மற்றொரு தனியாா் பேருந்தில் அமா்ந்திருந்த ஓட்டுநா், நடத்துநரிடம் வாய்த் தகராறில் ஈடுபட்டதோடு ஒருவருக்கொருவா் தாக்கிக் கொண்டு சண்டையிட்டுக் கொண்டனா். இவா்கள் சண்டையிடும் காட்சி தனியாா் பேருந்தில் இருந்த சிசிடிவி கேமராவில் பதிவானது. தற்போது தனியாா் பேருந்து நடத்துநா்கள், ஓட்டுநா்கள் சண்டையிடும் சிசிடிவி விடியோ காட்சி சமூக வலைதளங்களில் பரவி வருகிறது. இதுகுறித்து சத்தியமங்கலம் போலீஸாா் விசாரணை நடத்தி வருகின்றனா்.