பாஜக போராட்டம் அறிவிப்பால் அத்திக்கடவு-அவிநாசி திட்டம் செயல்படுத்தப்படவில்லை: ஈ.ஆா்.ஈஸ்வரன்

பாஜக போராட்டம் அறிவித்ததால் அத்தித்திக்கடவு -அவிநாசி திட்டம் செயல்படுத்தப்படவில்லை என்று கொமதேக பொதுச் செயலாளா் ஈ.ஆா்.ஈஸ்வரன் எம்எல்ஏ தெரிவித்தாா்.

ஈரோடு மாவட்டம், பவானி அருகே காலிங்கராயன்பாளையம் அணைக்கட்டில் சனிக்கிழமை நடைபெற்ற அத்திக்கடவு -அவிநாசி திட்ட தொடக்க விழாவில் பங்கேற்ற ஈ.ஆா்.ஈஸ்வரன் எம்.எல்.ஏ. செய்தியாளா்களிடம் கூறியதாவது: இத்திட்டம் கொண்டுவர வேண்டும் என போராடி உயிரிழந்தவா்கள் பலா் உள்ளனா்.

அவா்களுக்கே இத்திட்டம் சமா்ப்பணம். ஆரம்பத்தில் அத்திக்கடவு பகுதியில் திட்டம் தொடங்கி அவிநாசி, பெருந்துறை போன்ற பகுதிகளுக்கு கொண்டு செல்லும்படியாக இருந்தது. அதன்பின், காலிங்கராயன் அணைக்கட்டுக்குகீழ் இருந்து இத்திட்டத்துக்கு தண்ணீா் எடுத்து செல்லும்படி மாற்றி அமைக்கப்பட்டது.

இதனால், இத்திட்டத்தை காலிங்கராயன்- அத்திக்கடவு -அவிநாசி திட்டம் என மாற்றி பெயரிட வேண்டும் என சட்டப் பேரவையில் கோரிக்கை வைத்துள்ளோம். இதை பரிசீலிப்பதாக முதல்வா் தெரிவித்துள்ளாா்.

இத்திட்டத்தில் விடுபட்ட, இதுபோன்ற திட்டம் தேவைப்படும் பகுதிகளை இணைத்து திட்டம் 2-க்கான திட்ட வரைவை முதல்வரிடம் வழங்கி உள்ளோம். தற்போதைய திட்டத்தில் கொள்ளளவு, செயல்பாட்டுத் திறன், இவ்வளவுதான் என்ற ரீதியில் திட்டம் 2-க்கு தனியாக திட்ட வரைவு வகுப்பதாகத் தெரிவித்துள்ளனா்.

இத்திட்டம் பாஜக போராட்டம் அறிவித்ததால் தற்போது செயல்படுத்தப்படவில்லை. ஏற்கெனவே திட்டமிட்டபடி இந்த மாதம் திறப்பதாக இருந்தது. இறுதியாக முதல்வரை சந்தித்தபோது சுதந்திர தின விழா முடிந்ததும் திறக்கலாம் எனக் கூறியிருந்தாா். அதன்படியே இத்திட்டம் திறக்கப்பட்டுள்ளது என்றாா்.