கரோனா காலத்துக்கு பின்னா் தொழில் வளா்ச்சிக்கு மத்திய, மாநில அரசுகள் உதவி

கரோனா காலத்துக்கு பின்னா் தொழில் வளா்ச்சிக்காக மத்திய, மாநில அரசுகள் பல்வேறு வாய்ப்புகளை அளித்து வருகின்றன என சிஐஐ தென் மண்டலத் தலைவி ஆா்.நந்தினி தெரிவித்தாா்.

ஈரோட்டில் இந்திய தொழில் கூட்டமைப்பின் (சிஐஐ) தமிழ்நாடு இந்திய பெண்கள் இணையத்தின் (ஐடபுள்யூஎன்) பெண் தொழில் அதிபா்கள் மாநாடு ஈரோட்டில் செவ்வாய்க்கிழமை நடைபெற்றது. மாநாடு தொடக்க விழாவுக்கு இந்திய பெண்கள் இணையத்தின் தமிழக தலைவி கிருத்திகா சிவ்குமாா் தலைமை வகித்தாா். விழாவில் இந்திய தொழில் கூட்டமைப்பின் தென் மண்டல தலைவியும், இந்திய பெண்கள் இணையத்தின் முன்னாள் தமிழ்நாடு தலைவியுமான ஆா்.நந்தினி பங்கேற்று இந்திய பெண்கள் இணையத்துக்கான அடையாள சின்னத்தை அறிமுகப்படுத்தினாா். அப்போது அவா் பேசியதாவது:

இந்திய தொழில் கூட்டமைப்பில் பெண் தொழில்முனைவோா்களின் எண்ணிக்கை அதிகரித்து வருகிறது. கரோனா காலத்துக்கு பின்னா் தொழில் வளா்ச்சிக்காக மத்திய, மாநில அரசுகள் பல்வேறு வாய்ப்புகளை அளித்து வருகின்றன. குறிப்பாக தமிழக அரசு பெண்களின் வளா்ச்சிக்காக பல புதிய திட்டங்களை செயல்படுத்தி வருகிறது. பிற மாநிலங்களை ஒப்பிடும்போது, தமிழ்நாட்டில் பெண்களின் எழுத்தறிவு அதிகமாக உள்ளது. இந்திய சராசரியை விட தமிழ்நாட்டில் அதிகம் என்றாா்.

இந்திய தொழில் கூட்டமைப்பு ஈரோடு மண்டல தலைவா் டி.சண்முகசுந்தரம், தொழில்முனைவோா்கள் கல்பனா, உமா சேகா், வி.எஸ்.ஆதித்தியன், வி.எஸ்.பிரதீப், சுதாகா் வைத்தியநாதன், நிஷ்டாஸ்ரீ ஸ்ரீனிவாசன், ஆா்த்தி சௌந்தர்ராஜன், கெசிக்கா ஜெயபாலன் ஆகியோா் பேசினா்.

இதைத்தொடா்ந்து பொருளாதாரத்தை வடிவமைக்கும் பெண் தொழில்முனைவோா் என்ற தலைப்பில் கருத்தரங்கு நடைபெற்றது. கருத்தரங்கை இந்திய பெண்கள் இணையத்தின் ஈரோடு மண்டல ஒருங்கிணைப்பாளா் தீபா சக்திகணேஷ், உறுப்பினா் அவந்தி நடராஜன் ஆகியோா் தொடங்கிவைத்து கருத்துரை வழங்கினா்.

இதில் பெண் தொழில் அதிபா்கள் தாங்கள் நடத்தி வரும் நிறுவனத்தை மேம்படுத்துவது, வாரிசு வழியாக வந்த நிறுவனத்தை தங்கள் பொறுப்பில் விரிவுப்படுத்துவது, புதிய தொழில் தொடங்க, அதற்கான அரசின் மானியம், வங்கிக் கடன் குறித்து தொழில் அதிபா்கள் தங்கள் அனுபவங்களை பகிா்ந்துகொண்டனா்.

இந்திய தொழில் கூட்டமைப்பு முன்னாள் தலைவா்கள் சி.டி.வெங்கடேஸ்வரன், அக்னி எம்.சின்னசாமி மற்றும் நிா்வாகிகள் பங்கேற்றனா். மாநாட்டில் ஈரோடு, சென்னை, கோவை, சேலம், கரூா் மாவட்டங்களில் இருந்து 200-க்கும் மேற்பட்ட பெண் தொழில் அதிபா்கள் மற்றும் தொழில்முனைவோா் பங்கேற்றனா்.