தனியாா் கட்டுமான நிறுவனத்தில் லஞ்ச ஒழிப்பு போலீஸாா் சோதனை

ஈரோட்டை தலைமையிடமாக கொண்டு இயங்கும் தனியாா் கட்டுமான நிறுவனம் மற்றும் அதன் உரிமையாளா் வீடுகளில் லஞ்ச ஒழிப்புத் துறை போலீஸாா் சனிக்கிழமை சோதனையில் ஈடுபட்டனா்.

ஈரோடு பழையபாளையத்தில் இயங்கி வரும் தனியாா் கட்டுமான நிறுவனத்தின் அலுவலகத்தில் ஈரோடு லஞ்ச ஒழிப்புத் துறை டிஎஸ்பி சாந்தி தலைமையிலான காவல் துறையினா் திடீா் சோதனை மேற்கொண்டனா்.

இந்நிறுவனமானது குடியிருப்பு, பொது மற்றும் வணிகம், தொழிற்சாலை கட்டடங்கள், சாலைகள் மற்றும் பாலங்கள், நீா்ப் பாசனம் மற்றும் குடிநீா் வழங்கல் துறைகள், நீா் சுத்திகரிப்பு மற்றும் கழிவுநீா் சுத்திகரிப்பு நிலைய திட்டங்கள் மற்றும் ரயில்வே ஆகிய துறைகளில் பல்வேறு கட்டடங்களை கட்டியுள்ளனா்.

இதன் பின்னணியில், பெறப்பட்ட டெண்டா் ஆவணங்கள் மற்றும் தற்போதைய நிதி பரிவா்த்தனைகள் குறித்த முக்கிய ஆவணங்களை அதிகாரிகள் தீவிரமாக ஆய்வு செய்தனா்.

இதனிடையே அந்நிறுவன உரிமையாளரின் வீட்டிலும், திண்டுக்கல் மாவட்டத்தைச் சோ்ந்த லஞ்ச ஒழிப்புத் துறை போலீஸாா் சோதனையில் ஈடுபட்டனா். காலை 8 மணிக்கு தொடங்கிய சோதனை மாலை 6 மணிக்குப் பிறகும் நீடித்தது. இச்சோதனையின் முடிவிலேயே கைப்பற்றப்பட்ட ஆவணங்கள் மற்றும் முறைகேடுகள் குறித்த முழுமையான தகவல்கள் வெளியாகும் என எதிா்பாா்க்கப்படுகிறது.