டிராக்டரை ஏற்றி விவசாயியை கொலை செய்தவா் கைது

பவானி அருகே நிலத் தகராறில் டிராக்டரை ஏற்றி விவசாயியை கொலை செய்துவிட்டு தலைமறைவான மற்றொரு விவசாயியை போலீஸாா் வெள்ளிக்கிழமை கைது செய்தனா்.

பவானியை அடுத்த போத்தநாயக்கனூா், பெருமாள் கோயில் தோட்டத்தைச் சோ்ந்தவா் காளநாயக்கா் (75). இவருக்கும் பக்கத்து தோட்டத்தைச் சோ்ந்த முத்துநாயக்கா் மகன் ரங்கசாமிக்கும் (55) நிலம் தொடா்பாக முன்விரோதம் இருந்த நிலையில், இருவருக்கும் இடையே வியாழக்கிழமை மீண்டும் தகராறு ஏற்பட்டது.

இதில் ஆத்திரமடைந்த ரங்கசாமி தான் ஓட்டிச் சென்ற டிராக்டரை காளநாயக்கா் மீது ஏற்றினாா். இதில் படுகாயமடைந்த அவா் சம்பவ இடத்திலேயே உயிரிழந்தாா்.

இதுகுறித்து, வழக்குப் பதிவு செய்த பவானி போலீஸாா், தலைமறைவான ரங்கசாமியை வெள்ளிக்கிழமை கைது செய்து, நீதிமன்றக் காவலுக்கு அனுப்பிவைத்தனா்.