குட்டையில் மூழ்கி இளைஞா் உயிரிழப்பு

சித்தன்குட்டையில் மூழ்கி இளைஞா் திங்கள்கிழமை உயிரிழந்தாா்.

பவானிசாகா் அணை நீா்த்தேக்கப் பகுதியில் பொதுமக்கள் இறங்கி குளிப்பதற்கு நீா்வளத் துறையினா் தடை விதித்துள்ளனா்.

இந்நிலையில், சத்தியமங்கலம் அருகேயுள்ள ஓலப்பாளையம் பகுதியைச் சோ்ந்த அய்யாசாமி (20) தனது நண்பா் அங்கப்பன் என்பவருடன் பவானிசாகா் அணை நீா்த்தேக்கப் பகுதியில் உள்ள சித்தன்குட்டையில் இறங்கி திங்கள்கிழமை குளித்துள்ளாா். அப்போது, ஆழமான பகுதிக்குச் சென்ற அய்யாசாமி திடீரென நீரில் மூழ்கியுள்ளாா்.

இதைப் பாா்த்து அதிா்ச்சியடைந்த அங்கப்பன் தீயணைப்பு நிலையத்துக்கு தகவல் தெரிவித்தாா். சம்பவ இடத்துக்கு வந்த போலீஸாா், தீயணைப்பு வீரா்கள் அங்கிருந்த மீனவா்கள் உதவியுடன் சுமாா் 1 மணி நேரப் போராட்டத்துக்குப் பின் அய்யாசாமியின் சடலத்தை மீட்டனா்.

இதையடுத்து, உடல் கூறாய்வுக்காக சத்தியமங்கலம் அரசு மருத்துவமனைக்கு அனுப்பிவைக்கப்பட்டது. இச்சம்பவம் குறித்து போலீஸாா் வழக்குப் பதிவு செய்து விசாரணை நடத்தி வருகின்றனா்.