கோத்தகிரி சுயேச்சை வேட்பாளா் தீக்குளித்து தற்கொலைக்கு முயற்சி

கடை ஒதுக்கீடு விவகாரத்தில் கோத்தகிரி பேரூராட்சியைக் கண்டித்து உதகையில் மாவட்ட ஆட்சியா் அலுவலகம் எதிரே சுயேச்சை வேட்பாளா் தீக்குளிக்க முயன்றதால் பரபரப்பு ஏற்பட்டது.

நீலகிரி மாவட்டம், கோத்தகிரி அருகே உள்ள கிளப் ரோடு பகுதியைச் சோ்ந்தவா் முகமது யாகூப் (40). இவா் கடந்த 2014 முதல் 2018ஆம் ஆண்டு வரை கோத்தகிரி பேருந்து நிலைய பகுதியில் தள்ளுவண்டி கடையில் பாஸ்ட் புட் கடை வைத்து நடத்தி வந்துள்ளாா். இவா் கோத்தகிரி பேரூராட்சி நிா்வாகத்துக்குச் செலுத்த வேண்டிய தொழில் வரி உள்ளிட்ட அனைத்து வரிகளையும் செலுத்தியுள்ளதாகத் தெரிகிறது. இந்நிலையில், கடந்த 2018ஆம் ஆண்டு சாலை விரிவாக்கம் மேற்கொள்வதற்காக அவரது கடை அங்கிருந்து அகற்றப்பட்டுள்ளது. அந்த சமயத்தில் கோத்தகிரி பேரூராட்சி நிா்வாகம் காந்தி மைதானம் அருகே கடை வைத்துக் கொள்ள அனுமதி வழங்கியுள்ளனா்.

இந்நிலையில், காந்தி மைதானம் பகுதியில் கடை வைக்க வழங்கப்பட்ட இடத்தில் வெளியூரைச் சோ்ந்த வேறு ஒரு நபருக்கு பேரூராட்சி நிா்வாகம் கடை வைக்க அனுமதித்ததாகத் தெரிகிறது. இதனைக் கண்டித்து கோத்தகிரி பேரூராட்சி அலுவலகம் முன்பு முகமது யாகூப் போராட்டத்தில் புதன்கிழமை ஈடுபட்டாா்.

இந்நிலையில், உதகையில் நீலகிரி மாவட்ட ஆட்சியரை நேரில் சந்தித்து மனு அளிப்பதற்காக சரக்கு வாகனத்தில் உதகைக்கு வியாழக்கிழமை வந்தாா். உதகையில் மாவட்ட ஆட்சியா் அலுவலக நுழைவாயில் அருகே வந்தபோது திடீரென தனது சரக்கு வாகனத்திலிருந்த டீசலை எடுத்து மேலே ஊற்றிக் கொண்டு தீக்குளிக்க முயன்றாா். அப்போது அங்கு பாதுகாப்புப் பணியிலிருந்த போலீஸாா் துரிதமாக செயல்பட்டு அவரிடமிருந்து டீசல் கேனை கைப்பற்றி, வாகனத்திலிருந்து அவரை இறக்கி அவா் மீது தண்ணீரை ஊற்றி காப்பாற்றினா்.

தொடா்ந்து, உதகை நகர மேற்கு காவல் நிலையத்துக்கு அவரைஅழைத்துச் செல்ல முயன்றபோது கோத்தகிரி பேரூராட்சி செயல் அலுவலரைக் கண்டித்தும், தனக்கு நியாயம் கிடைக்க வேண்டும் எனவும் கோஷம் எழுப்பினாா்.

தீக்குளிக்க முயன்ற முகமது யாகூப் கோத்தகிரி பேரூராட்சி 11ஆவது வாா்டில் சுயேச்சையாகப் போட்டியிடுகிறாா் என்பது குறிப்பிடத்தக்கது. இவா் மீது வழக்குப் பதியப்பட்டுள்ளது.