மத்திய அமைச்சா் எல்.முருகன் வேட்புமனு தாக்கல்

நீலகிரி மக்களவைத் தொகுதியில் பாஜக வேட்பாளரான மத்திய இணை அமைச்சா் எல்.முருகன் மாவட்ட தோ்தல் அதிகாரியிடம் திங்கள்கிழமை வேட்பு மனு தாக்கல் செய்தாா். நீலகிரி மக்களவைத் தொகுதியில் பாஜக சாா்பில் போட்டியிடும் மத்திய இணை அமைச்சா் எல்.முருகன், பாஜக மாநிலத் தலைவா் கே.அண்ணாமலை ஆகியோா் உதகையில் பிரசித்தி பெற்ற மாரியம்மன் கோயிலில் சிறப்பு வழிபாடு செய்தனா். இதைத் தொடா்ந்து, உதகை காபி ஹவுஸ் சதுக்கத்திலிருந்து வாகனத்தில் எல்.முருகன், பாஜகவினா், கூட்டணிக் கட்சியினருடன் பிரம்மாண்ட பேரணியாகச் சென்று மாவட்ட ஆட்சியரும், மாவட்ட தோ்தல் அதிகாரியுமான மு.அருணாவிடம் வேட்புமனு தாக்கல் செய்தாா். முன்னதாக, கோத்தகிரி அருகே உள்ள படுகா் இன மக்களின் குலதெய்வமான பேரகணி ஹெத்தை அம்மன், சக்திமலை முருகன் கோயில்களில் காணிக்கை செலுத்தி எல்.முருகன் வழிபட்டாா்.