அடிப்படை வசதிகள் கோரி உண்ணாவிரதப் போராட்டம்

திருப்பூர் மாநகராட்சி, 59-ஆவது வார்டுக்குள்பட்ட ஆண்டிபாளையத்தில் அடிப்படை வசதிகளை நிறைவேற்றக்கோரி, அப்பகுதி மக்கள் வெள்ளிக்கிழமை உண்ணாவிரதப் போராட்டத்தில் ஈடுபட்டனர்.

 திருப்பூர் மாநகராட்சி, 59-வது வார்டுக்கு உள்பட்ட தனலட்சுமி நகர், ஆண்டிபாளையம், முல்லை நகர், குறிஞ்சி நகர் உள்ளிட்ட பகுதிகளில் ஆயிரத்துக்கு மேற்பட்ட குடியிருப்புகள் உள்ளன. இந்நிலையில், இப்பகுதிகளில் சாக்கடை கால்வாய்  சாலை வசதி, குடிநீர் வசதி உள்ளிட்ட அடிப்படை வசதிகள் செய்து தரப்படவில்லை எனக் கூறப்படுகிறது.

இதுகுறித்து மாநகராட்சி நிர்வாகத்திடம் பலமுறை புகார் தெரிவித்தும் எவ்வித நடவடிக்கையும் எடுக்கவில்லை எனக் கூறி, அப்பகுதி பொதுமக்கள் உண்ணாவிரதப் போராட்டத்தில் ஈடுபட்டனர்.  தகவலறிந்து சம்பவயிடத்திற்கு வந்த மாநகராட்சி 4-ஆவது மண்டல உதவி ஆணையர் செல்வநாயகம், பொறியாளர் ரவி உள்ளிட்ட அதிகாரிகள் போராட்டத்தில் ஈடுபட்டவர்களுடன் பேச்சுவார்த்தை நடத்தினர். இதில், விரைவில் அடிப்படை வசதிகள் அனைத்தும் நிறைவேற்றி தருவதாக அதிகாரிகள் உறுதியளித்தனர்.