விளைபொருள்களுக்கு ஆதார விலை நிர்ணயம்: விவசாயிகள் சங்க மாநாட்டில் கோரிக்கை

விவசாய விளை பொருள்களுக்கு ஆதார விலை நிர்ணயிக்க வேண்டும் என கோரிக்கை விடுக்கப்பட்டுள்ளது.
தமிழ்நாடு விவசாயிகள் சங்கத்தின் உடுமலை வட்டார மாநாடு  ஞாயிற்றுக்கிழமை நடைபெற்றது. இதில் நிறைவேற்றப்பட்ட தீர்மானங்கள்:
உடுமலை, மடத்துக்குளம் வட்டங்களில் தக்காளி அதிக அளவு உற்பத்தியாகும்போது விலை கிடைக்காமல் விவசாயிகள் அவதிக்கு உள்ளாகி வருகின்றனர். எனவே தக்காளியை மதிப்புக் கூட்டும் பொருளாக மாற்றும் ஆலையைத் துவக்க வேண்டும். மேலும் குளிர்பதனக் கிடங்கையும் அமைக்க வேண்டும். 
மக்காச்சோள அறுவடை துவங்கியுள்ள நிலையில் அதை மார்க்கெட்டிங் கமிட்டி கிடங்குகளில் இருப்பு வைக்கும் விவசாயிகளுக்கு தொடக்க வேளாண்மை கூட்டுறவு வங்கிகள் மூலம் வட்டியில்லாக் கடன் வழங்க வேண்டும். 
உடுமலை வட்டத்தில் எலையமுத்தூர், ஜல்லிபட்டி, தளி, சி.குமாரபாளையம், குறிச்சிக்கோட்டை ஆகிய கிராமங்களில் காட்டுப் பன்றிகள் விளைநிலங்களில் புகுந்து பயிர்களை சேதப்படுத்துகின்றன. எனவே வனத்துறை மூலம் காட்டுப் பன்றிகளை பிடிப்பதற்கு ஏற்பாடு செய்ய வேண்டும் என்பது உள்ளிட்ட பல்வேறு தீர்மானங்கள் மாநாட்டில் நிறைவேற்றப்பட்டன. 
நிர்வாகிகள் வி.சௌந்திரராஜன், கே.எஸ்.ரணதேவ் உள்ளிட்டோர் இதற்கான ஏற்பாடுகளைச் செய்திருந்தனர்.