பழையகோட்டை மாட்டுச் சந்தை மீண்டும் துவக்கம்:  ரூ. 11 லட்சத்துக்கு காங்கேயம் இன மாடுகள் விற்பனை

நத்தக்காடையூர் அருகே பழையகோட்டையில் மாட்டுச் சந்தை ஞாயிற்றுக்கிழமை முதல் மீண்டும் செயல்படத் துவங்கியுள்ளது. இதில், காங்கேயம் இன மாடுகள் ரூ. 11 லட்சத்துக்கு விற்பனையாயின.
காங்கயம் அருகே, நத்தக்காடையூர்- பழையகோட்டையில் காங்கேயம் இன மாடுகளுக்கான பிரத்யேக சந்தை நடைபெற்று வருகிறது. 
இந்தச்  சந்தையில் காங்கேயம் இன மாடுகள் மட்டுமே விற்பனைக்கு அனுமதிக்கப்படுகின்றன. 
இது இடைத்தரகர் இல்லாத சந்தை என்பதால் விவசாயிகளிடம் வரவேற்பைப் பெற்றுள்ளது. இந்த மாட்டுச் சந்தையில் மாடுகளுக்கு நல்ல விலை கிடைக்கிறது.
கால்நடைகளுக்கு ஏற்பட்டு வரும் கோமாரி நோயின் தாக்குதலால், மாட்டுச் சந்தைகளை தற்காலிகமாக மூட அரசு உத்திரவிட்டிருந்தது. 
இதையடுத்து கடந்த சில வாரங்களாக மூடப்பட்டிருந்த இந்த சந்தை, ஞாயிற்றுக்கிழமை மீண்டும் செயல்படத் துவங்கியது.
ஞாயிற்றுக்கிழமை நடந்த சந்தையில் 48 காங்கேயம் இன மாடுகள் விற்பனைக்குக் கொண்டு வரப்பட்டிருந்தன. 
இதில் பசுங்கன்றுகள் ரூ. 15 ஆயிரம் முதல் ரூ. 30 ஆயிரம் வரை விற்பனையாயின. காளைக் கன்றுகள் ரூ. 15 ஆயிரம் முதல் ரூ. 50 ஆயிரம் வரை விற்கப்பட்டன. 
இந்த வாரச் சந்தையில் 23 மாடுகள் மொத்தம் ரூ. 11 லட்சத்துக்கு விற்பனையாயின. அதிகபட்சமாக ரூ. 84 ஆயிரத்துக்கு கன்றுக் குட்டியுடன் காங்கேயம் இனப் பசு விற்பனையானது. 
வரும் வாரத்தில் அதிக அளவில் மாடுகள் விற்பனைக்கு வர வாய்ப்புள்ளது என சந்தை மேற்பார்வையாளர்கள் தெரிவித்தனர்.