திருப்பூரில் நாளை தனியார் வேலைவாய்ப்பு முகாம்

தனியார் நிறுவனங்கள் பங்கேற்கும் வேலைவாய்ப்பு முகாம் திருப்பூர் ஆட்சியர் அலுவலக வளாகத்திலுள்ள மாவட்ட வேலைவாய்ப்பு அலுவலகத்தில் வெள்ளிக்கிழமை (செப்டம்பர் 14)நடைபெற உள்ளது.
இதுகுறித்து மாவட்ட ஆட்சியர் கே.எஸ்.பழனிசாமி வெளியிட்டுள்ள அறிக்கையில் கூறியிருப்பதாவது:
தனியார் துறை வேலைவாய்ப்பு முகாம்,  திருப்பூர் மாவட்ட ஆட்சியர் வளாகத்திலுள்ள உள்ள மாவட்ட வேலைவாய்ப்பு அலுவலகத்தில் வெள்ளிக்கிழமை (செப்டம்பர் 14) காலை 10.30 மணிக்கு நடைபெறும். 
இந்த வேலைவாய்ப்பு முகாமில் பல்வேறு தனியார் நிறுவனத்தினர் கலந்துகொண்டு தங்களுக்குத் தேவையானவர்களைத் தேர்வு செய்ய உள்ளனர்.  
எழுதப் படிக்கத் தெரிந்தவர்கள் முதல் முதுநிலை பட்டதாரிகள் வரையிலும்,  ஐ.டி.ஐ.,  டிப்ளமோ படித்தவர்கள், ஓட்டுநர்கள் மற்றும் தையல் பயிற்சி பெற்றவர்கள் உள்ளிட்ட அனைவரும் இதில் கலந்து கொண்டு பயன்பெறலாம்.   
இந்த முகாமுக்கு வரும்போது தங்களது வேலைவாய்ப்பு பதிவில் குறைகள் இருந்தால்,  அதையும் சரிசெய்தல் மற்றும் புதுப்பித்து கொள்ளலாம்; கூடுதல் கல்வித் தகுதிகளையும் பதிவு செய்து கொள்ளலாம்.  
தகுதியிருப்பின் வேலைவாய்ப்பற்றோர் உதவித் தொகை விண்ணப்பம் பெற்று உதவித்தொகை பெறவும் விண்ணப்பிக்கலாம். 
தனியார் துறைகளில் வேலையில் சேருவதால் தங்களின் வேலைவாய்ப்பு அலுவலகப் பதிவு எண் ரத்து செய்யப்பட மாட்டாது. வேலை தேடுபவர்கள் தங்கள் வேலைவாய்ப்பு அலுவலகப் பதிவு அட்டை, சுயதகவல் படிவத்துடன் கலந்து கொள்ளலாம். மேலும் தங்கள் வருகையை வேலைவாய்ப்பு அலுவலகத்தில் முன்பதிவு செய்து கொள்ள வேண்டும் எனத் தெரிவித்துள்ளார்.