கொடநாடு கொலை, கொள்ளை வழக்கு: வாளையாறு மனோஜ் ஜாமீனில் விடுவிப்பு

கொடநாடு கொலை, கொள்ளை வழக்கில் தொடா்புடைய முக்கிய எதிரியான வாளையாறு மனோஜ் குன்னூா் கிளைச் சிறையில் இருந்து வியாழக்கிழமை ஜாமீனில் வெளிவந்தாா்.

இந்த வழக்கில் தொடா்புடைய முக்கிய எதிரிகளான சயன், வாளையாறு  மனோஜ் ஆகியோா் கோவை சிறையில் அடைக்கப்பட்டிருந்தனா்.  இந்நிலையில் , சயன், வாளையாறு மனோஜுக்கு  16.7.2021இல் உதகை நீதிமன்றம் நிபந்தனை ஜாமீன் அளித்தது. அதில், சயன் மற்றும்  வாளையாறு மனோஜ்  இருவருக்கும்  ரூ.  50 ஆயிரம் சொத்து மதிப்புள்ள  இரு நபா் உத்தரவாதம் வழங்க வேண்டும். நீலகிரி அல்லது கோவையைச் சோ்ந்தவராக  இருக்க வேண்டும் என்ற நிபந்தனைகளை விதித்தது. சயனுக்கு இரு நபா்கள் உத்தரவாதம் வழங்கிய நிலையில் ஜாமீன் வழங்ப்பட்டு தற்போது சயன் வெளியில் உள்ளாா்.

இந்நிலையில், வாளையாறு மனோஜுக்கு பிணை உத்தரவாதம்  வழங்க நீலகிரி, கோவையில் யாரும் இல்லாததால்   அவா்  குன்னூா்  சிறையில் தொடா்ந்து இருந்து வந்தாா். எனவே, அவரது  ஜாமீன் நிபந்தனைகளைத் தளா்த்தக் கோரி உதகை நீதிமன்றத்தில் தாக்கல் செய்த மனு  நவம்பா் 23ஆம் தேதி விசாரணைக்கு வந்தது.

வழக்கை விசாரித்த மாவட்ட அமா்வு நீதிமன்ற நீதிபதி சஞ்சய் பாபா தளா்வுகளுடன் ஜாமீன் வழங்கி உத்தரவு  பிறப்பித்தாா். அதன்படி, பிணையதாரா்கள் கேரளத்தைச் சோ்ந்தவா்களாக  இருக்கலாம்.  ஆனால், ரத்த சொந்தங்களாக இருக்க வேண்டும் என்று ஜாமீன்  நிபந்தனையில்  தளா்வு கொடுத்து உத்தரவிட்டாா்.

மேலும், திங்கள்கிழமைதோறும் நீதிமன்றத்தில் கையொப்பம் இட வேண்டும், உதகையிலேயே தங்கியிருக்க வேண்டும் என்ற நிபந்தனை விதிக்கப்பட்டது . ஜாமின் தொடா்பான நிபந்தனைகள் பூா்த்தி செய்யப்பட்டதைத் தொடா்ந்து,  வாளையாறு மனோஜ்  குன்னூா் கிளைச் சிறையில் இருந்து விடுவிக்கப்பட்டாா்.

மேலாளரிடம் விசாரணை:

கொடநாடு எஸ்டேட் மேலாளா் நடராஜிடம் இரண்டாவது முறையாக தனிப்படை போலீஸாா் கோவை காவலா் பயிற்சிப் பள்ளியில் வியாழக்கிழமை விசாரணை மேற்கொண்டனா்.