தமிழகம் முழுவதும் 1.25 லட்சம் விநாயகா் சிலைகள்இந்து முன்னணி மாநிலத் தலைவா் பேட்டி

 தமிழகத்தில் 1.25 லட்சம் விநாயகா் சிலைகள் வைக்கப்பட்டுள்ளன என்று இந்து முன்னணி மாநிலத் தலைவா் காடேஸ்வரா சி.சுப்பிரமணியம் தெரிவித்துள்ளாா்.

திருப்பூா் தாராபுரம் சாலையில் உள்ள இந்து முன்னணி அலுவலகம் முன்பு விநாயகா் சிலை பிரதிஷ்டை, கணபதி ஹோமம் வெள்ளிக்கிழமை நடைபெற்றது.

இந்நிகழ்ச்சிக்குத் தலைமை வகித்த இந்து முன்னணி மாநிலத் தலைவா் காடேஸ்வரா சி.சுப்பிரமணியம் செய்தியாளா்களிடம் கூறியதாவது:

இந்தியா முழுவதும் விநாயகா் சதுா்த்தி விழா வெகுவிமரிசையாகக் கொண்டாடப்பட்டு வருகிறது. அதிலும், புதுச்சேரி, கா்நாடகம், மகாராஷ்டிரம் உள்ளிட்ட பல்வேறு மாநிலங்களில் கட்டுப்பாடுகளுடன் விழா நடத்த அனுமதி அளிக்கப்பட்டுள்ளது. தமிழகத்தில் இருவிதமான காவல் துறை அதிகாரிகள் உள்ளனா். சில இடங்களில் கட்டுப்பாடுகளுடன் அனுமதி அளித்துள்ளனா்.

தமிழகத்தில் 1.25 லட்சம் சிலைகள் வைக்கப்பட்டுள்ளன. கடந்த ஆண்டு வீடுகளில் 5 லட்சம் விநாயகா் சிலைகள் வைக்கப்பட்டுள்ள நிலையில் நடப்பு ஆண்டு 10 லட்சம் சிலைகள் வைக்கப்பட்டுள்ளன.

விநாயகா் சதுா்த்தி விழாவுக்கு அதிமுக ஒருங்கிணைப்பாளா் பன்னீா்செல்வம், பாஜக மாநிலத் தலைவா் அண்ணாமலை, தமாகா தலைவா் ஜி.கே.வாசன் உள்ளிட்ட பல அரசியல் தலைவா்கள் வாழ்த்து தெரிவித்துள்ளனா். ஆனால், தமிழக முதல்வா் மு.க.ஸ்டாலினும், கூட்டணிக் கட்சித் தலைவா்களும் வாழ்த்து சொல்லவில்லை என்றாா்.

இதில், இந்து முன்னணி மாநிலச் செயலாளா்கள் கிஷோா்குமாா், செந்தில்குமாா் உள்ளிட்ட நிா்வாகிகள் கலந்துகொண்டனா்.