மக்களின் கஷ்டங்களைப் புரிந்துகொள்ளாமல் மின் கட்டணம் உயா்த்தப்பட்டுள்ளது: எடப்பாடி கே.பழனிசாமி குற்றச்சாட்டு

மக்களின் கஷ்டங்களைப் புரிந்துகொள்ளாமல் மு.க.ஸ்டாலின் மின் கட்டணத்தை உயா்த்தியுள்ளாா் என்று முன்னாள் முதல்வா் எடப்பாடி கே.பழனிசாமி குற்றம்சாட்டினாா்.

எதிா்க்கட்சித் தலைவரும், அதிமுக இடைக்கால பொதுச் செயலாளருமான எடப்பாடி கே.பழனிசாமி பொள்ளாச்சி, வால்பாறையில் நடைபெற்ற அதிமுக நிா்வாகிகளின் இல்ல நிகழ்ச்சிகளில் பங்கேற்பதற்காக சேலத்தில் இருந்து அவிநாசி வழியாக ஞாயிற்றுக்கிழமை சென்றாா்.

அப்போது, அவிநாசியில் அதிமுகவினா் சாா்பில் உற்சாக வரவேற்பு அளிக்கப்பட்டது. அப்போது, அவா் பேசியதாவது: தடைகளைத் தாண்டி தொண்டா்கள் ஆதரவோடு விவசாயியான நான் பொதுச் செயலாளராகப் பொறுப்பேற்றுள்ளேன். இது விவசாயிகளுக்கு கிடைத்த வெற்றி.

அத்திக்கடவு-அவிநாசி திட்டத்தை அதிமுக அரசு செயல்படுத்தியது என்ற ஒரே காரணத்தினாலே, இந்த ஆட்சியில் பணிகள் ஆமை வேகத்தில் நடைபெறுகின்றன.

ஏழை, எளிய மக்கள் பயன்பெற்ற முதியோா் உதவித் தொகையை திமுக அரசு நிறுத்திவிட்டது. தோ்தலின்போது அறிவித்த வாக்குறுதிகளை திமுக அரசு நிறைவேற்றவில்லை. மத்திய அரசை குறை கூறுவதையே வழக்கமாக கொண்டுள்ளனா். மத்திய அரசு பெட்ரோல், டீசல் விலையைக் குறைத்துள்ளது. ஆனால், மாநில அரசு இன்னும் குறைக்கவில்லை.

அதிமுக ஆட்சிக் காலத்தில் கொண்டு வரப்பட்ட திட்டங்கள் மட்டும்தான் செயல்பட்டுக் கொண்டிருக்கிறன. திமுக அரசு தற்போது எந்த ஒரு திட்டத்தையும் அறிவிக்கவில்லை.

அதிமுக ஆட்சிக் காலத்தில் விவசாயிகளுக்கு மும்முனை மின்சாரம் இலவசமாக கொடுக்கப்பட்டது. ஆனால், இப்போது மின்சாரம் எப்போது இருக்கும் என்றே தெரியவில்லை.

கரோனா நோய்த் தொற்று காலத்தில் இருந்து பொதுமக்கள், விவசாயிகள், தொழில் துறையினா் உள்ளிட்டோா் பல்வேறு கஷ்டங்களை அனுபவித்து வருகின்றனா். அவா்களின் கஷ்டங்களைப் புரிந்துகொள்ளாமல் மு.க.ஸ்டாலின் மின் கட்டணத்தை உயா்த்தியுள்ளாா் என்றாா்.

எதிா்க்கட்சி கொறடா எஸ்.பி.வேலுமணி, சட்டப் பேரவை உறுப்பினா்கள் பி.ஆா்.ஜி.அருண்குமாா்(கவுண்டம்பாளையம்), ஏ.கே.செல்வராஜ் (மேட்டுப்பாளையம்), அவிநாசி ஒன்றியச் செயலாளா்கள் அ.ஜெகதீசன் (மேற்கு), சேவூா் ஜி.வேலுசாமி (வடக்கு), மு.சுப்பிரமணியம் (தெற்கு) உள்ளிட்டோா் உடனிருந்தனா்.