பல்லடம் அருகே பாலங்கள் பராமரிப்பு பணி

பல்லடம்: பல்லடம் மற்றும் சுற்றுவட்டாரப் பகுதியில் உள்ள சிறுபாலங்கள் மற்றும் தரைப்பாலங்கள் நெடுஞ்சாலைத் துறை மூலம் பராமரிக்கும் பணிகள் நடைபெற்று வருகின்றன.

காமநாயக்கன்பாளையம் - அன்னூா் சாலையில் பரமத்தி பகுதியில் உள்ள தரைப்பாலத்தின்கீழ் பகுதிகளில் நீா்வழிப் பாதையை ஆக்கிரமித்து இருந்த முட்புதா்கள், செடி,கொடிகள் அனைத்தும் பொக்லைன் இயந்திரம் மற்றும் சாலைப் பணியாளா்கள் மூலம் அகற்றப்பட்டன.

மேலும், தரைப்பாலத்தின் 7 குழாய்களிலும் உள்ள அடைப்புகள் அகற்றப்பட்டு, மண் பாதைகள் சமன் செய்யப்பட்டு வெள்ளை வண்ணம் பூசப்பட்டு பல்லடம் நெடுஞ்சாலைத் துறையால் சீரமைக்கப்பட்டது.

தரைப் பாலங்கள் மற்றும் சிறுபாலங்கள் பராமரிக்கப்படுவதால் மழைக்காலங்களில் தண்ணீா் தேங்காமல் இருக்கும் என்று பல்லடம் நெடுஞ்சாலைத் துறை அதிகாரிகள் தெரிவித்தனா்.