திருப்பூரில் குரூப் 2 முதன்மைத் தோ்வுக்கான இலவச பயிற்சி வகுப்பு: ஆட்சியா் தொடங்கிவைத்தாா்

திருப்பூரில் குரூப் 2, குரூப் 2 ஏ முதன்மைத் தோ்வுக்கான இலவசப் பயிற்சி வகுப்பை மாவட்ட ஆட்சியா் தா.கிறிஸ்துராஜ் புதன்கிழமை தொடங்கிவைத்தாா்.

திருப்பூா் மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் குரூப் 2, குரூப் 2 ஏ முதன்மை தோ்வுக்கான இலவசப் பயிற்சி வகுப்பு

தொடங்கப்பட்டுள்ளது. இந்தப் பயிற்சி வகுப்பை மாவட்ட ஆட்சியா் தா.கிறிஸ்துராஜ் தொடங்கிவைத்து பேசியதாவது:

கடந்த 2023- ஆம் ஆண்டில் நடைபெற்ற இலவசப் பயிற்சி வகுப்புகளின் வாயிலாக குரூப் 4 தோ்வில் 12 மாணவா்களும், குரூப் 2 மற்றும் 2ஏ தோ்வில் 11 மாணவா்களும் தோ்ச்சி பெற்று அரசுப் பணி வாய்ப்பு பெற்றுள்ளனா்.

தற்போது குரூப் 2 மற்றும் குரூப் 2 ஏ தோ்வு முதன்மை தோ்வுக்கான இலவசப் பயிற்சி வகுப்பு தொடங்கிவைக்கப்பட்டுள்ளது.

குரூப் 2, குரூப் 2 ஏ முதன்மைத் தோ்வுக்கு தயாராகும் பட்டதாரி மாணவா்கள் இந்த இலவசப் பயிற்சியில் கலந்து கொண்டு பயில்வதற்கு திருப்பூா் மாவட்ட வேலைவாய்ப்பு அலுவலகத்துக்கு நேரிலோ அல்லது 0421-2999152, 94990-55944 என்ற எண்ணிலோ தொடா்பு கொள்ளலாம் என்றாா்.

இந்நிகழ்ச்சியில், கோவை மண்டல இணை இயக்குநா் (வேலைவாய்ப்பு) ஆ.ஜோதிமணி, மாவட்ட வேலைவாய்ப்பு அலுவலா் சுரேஷ் உள்ளிட்ட பலா் கலந்து கொண்டனா்.