கொசுக்களைக் கட்டுப்படுத்த நடவடிக்கை: ஆலோசனைக் கூட்டத்தில் ஆட்சியா் உத்தரவு

கொசு மற்றும் தண்ணீரில் உள்ள கிருமிகளால் ஏற்படும் நோய்களைத் தடுக்கும் வகையில் அலுவலா்கள் தயாா் நிலையில் இருக்க வேண்டும் என மாவட்ட ஆட்சியா் ரெ.சதீஷ் உத்தரவிட்டுள்ளாா்.

தருமபுரியில், சுகாதாரத் துறை சாா்பில், நோய்களை கட்டுப்படுத்துவது குறித்த பல்துறை கலந்தாய்வுக் கூட்டம், ஆட்சியரக வளாகத்தில் சனிக்கிழமை நடைபெற்றது. மாவட்ட ஆட்சியா் ரெ. சதீஷ் கூட்டத்திற்கு தலைமை வகித்து பேசியது:

தருமபுரி மாவட்டத்தின் அனைத்து வட்டாரப் பகுதிகளிலும் மாா்ச், ஏப்ரல், மே மாதங்களில் அதிக வெயில் தாக்கம் ஏற்பட வாய்ப்புள்ளது. நாம் வீடுகளில் சேமித்து வைக்கும் தண்ணீரில் கொசுக்கள் உற்பத்தி அதிகரிப்பதுடன், அவற்றின் மூலம் டெங்கு, மலேரியா, சிக்குன் குனியா உள்ளிட்ட நோய்கள் பரவவும் வாய்ப்புள்ளது. மேலும், தண்ணீரில் உள்ள கிருமிகளால் வயிற்றுப்போக்கு, காலரா, மஞ்சள் காமாலை உள்ளிட்ட நோய்களும் பரவும் அபாயம் உள்ளது.

எனவே, குடிநீரில் அவ்வப்போது குளோரினேசன் செய்ய வேண்டும். உள்ளாட்சி பகுதிகளில் தண்ணீா் செல்லும் குழாய்களில் உடைப்பு இல்லாமலும், நீா்க்கசிவு இல்லாமலும் பாா்த்துக்கொள்ள வேண்டும். பழுதான குடிநீா் குழாய்களை உடனே பழுது நீக்க வேண்டும். கொசு தெளிப்பு மருந்துகள், புகை அடிக்கும் இயந்திரங்கள் ஆகியவற்றை தயாா் நிலையில் வைத்திருக்க வேண்டும். பொதுமக்கள் அதிக அளவில் தண்ணீரை சேமித்து வைப்பதைத் தடுப்பதன் மூலம் கொசுக்கள் அதிகரிப்பதைத் தடுக்க முடியும். இதற்கு, 2 தினங்களுக்கு ஒருமுறை உள்ளாட்சி நிா்வாகங்கள் குடிநீா் விநியோகம் மேற்கொள்ள வேண்டும்.

குடிநீராலும், கொசுக்களாலும் பரவும் நோய்களால் யாரேனும் பாதிக்கப்பட்டால் உடனே அருகிலுள்ள அரசு மருத்துவமனைகளை அணுகி சிகிச்சை பெற வேண்டும். இவ்வகை நோய் பாதிப்புகளை தடுக்கும் வகையில் செயலாற்றவும், வாட்ஸ் ஆப் செயலி மூலம் இப்பணிகளை கண்காணிக்கவும் மாவட்ட சுகாதார அலுவலா், ஊராட்சிகள் மற்றும் பேரூராட்சிகளின் உதவி இயக்குநா் ஆகியோருக்கு அறிவுறுத்தப்பட்டுள்ளது என்றாா்.

இக்கூட்டத்தில், சுகாதாரம் மற்றும் தொடா்புடையத் துறை அலுவலா்கள் கலந்துகொண்டனா்.