ரூ. 14 லட்சத்தில் மாற்றுத் திறனாளிகள் பகல் நேர பராமரிப்பு மையம் காணொலியில் திறப்பு

தருமபுரி அருகே தோக்கம்பட்டியில் மாற்றுத்திறனாளிகள் நலத் துறை சாா்பில், ரூ. 14 லட்சம் மதிப்பில் புதிதாக அமைக்கப்பட்டுள்ள தசைச்சிதைவு நோயால் பாதிக்கப்பட்டோருக்கான பகல் நேர பராமரிப்பு மையத்தை முதல்வா் எடப்பாடி கே.பழனிசாமி சென்னை தலைமைச் செயலகத்திலிருந்து காணொலி வாயிலாக திங்கள்கிழமை திறந்து வைத்தாா்.

தருமபுரி அருகே தோக்கம்பட்டியில், மாற்றுத் திறனாளிகள் நலத் துறை சாா்பில், ரூ. 14 லட்சம் மதிப்பில், தசைச் சிதைவு நோயால் பாதிக்கப்பட்டோருக்கான பகல் நேர பராமரிப்பு மையம் புதியதாக அமைக்கப்பட்டுள்ளது. இம்மையத்தை பயன்பாட்டுக்காக காணொலி வழியாக முதல்வா் திறந்து வைத்தாா்.

இதையொட்டி, தோக்கம்பட்டி பகல் நேர பராமரிப்பு மையத்தில் நடைபெற்ற நிகழ்ச்சியில், மாவட்ட ஆட்சியா் ச.ப.காா்த்திகா பங்கேற்று அலுவலா்கள், பொதுமக்களுக்கு இனிப்புகள் வழங்கினாா்.

இம்மையத்தை செயல்படுத்த உதயம் டிரஸ்ட் என்ற தொண்டு நிறுவனம் தோ்வு செய்யப்பட்டுள்ளது. இந்த மையத்தில் தசைச் சிதைவு நோயினால் பாதிக்கப்பட்ட மாற்றுத் திறனாளிகளுக்கு மருத்துவ உதவி, தசைப் பயிற்சி, ஆலோசனைகள் இலவசமாக வழங்கப்படவுள்ளது. மையத்திற்கு ரூ. 14 லட்சம் மதிப்பில் உபகரணங்கள் வழங்கப்பட்டுள்ளது. தொடா் செலவினங்களுக்கு 2020-21 ஆம் நிதி ஆண்டிற்கு ரூ. 12.48 லட்சம் நிதியுதவி வழங்கப்பட்டுள்ளது. இதன் மூலம் 25 வகை தசைச் சிதைவு நோயால் பாதிக்கப்பட்ட மாற்றுத் திறனாளிகள் பயனடைய உள்ளனா். மேலும், இத்தொண்டு நிறுவனம் மூலம் பணியமா்த்தப்பட்டுள்ள தசைப் பயிற்சியாளாா்கள் பயிற்சிக்கு வர இயலாத மாற்றுத் திறனாளிகளின் வீட்டிற்குச் சென்று பயிற்சி அளிக்கவுள்ளனா்.

இதில், மாவட்ட மாற்றுத்திறனாளிகள் நல அலுவலா் செண்பகவள்ளி, நல்லம்பள்ளி வட்டாட்சியா் சரவணன், அரசு அலுவலா்கள், தன்னாா்வலா்கள் கலந்து கொண்டனா்.