தொப்பூா் கணவாய்ச் சாலையில் தீவிர முன்னெச்சரிக்கை நடவடிக்கை: அதிகாரிகளுக்கு ஆணையா் உத்தரவு

தொப்பூா் கணவாய் தேசிய நெடுஞ்சாலையில் விபத்துகளைத் தடுக்க முன்னெச்சரிக்கை நடவடிக்கைகளை தீவிரப்படுத்துமாறு துறை அலுவலா்களுக்கு சாலை பாதுகாப்பு ஆணையா் எஸ்.நடராஜன் வியாழக்கிழமை உத்தரவிட்டாா்.

தருமபுரி மாவட்டம், தொப்பூா் கணவாய் தேசிய நெடுஞ்சாலையில் ஏற்படும் சாலை விபத்துகளைத் தடுப்பது குறித்து போக்குவரத்து, சாலை பாதுகாப்பு ஆணையா் எஸ்.நடராஜன் வியாழக்கிழமை நேரில் ஆய்வு செய்தாா்.

பின்பு, மாவட்ட ஆட்சியா் அலுவலகத்தில் ஆட்சியா் ச.திவ்யதா்சினி முன்னிலையில் நடைபெற்ற சாலை விபத்துகளைத் தடுப்பது குறித்து ஆலோசனைக் கூட்டத்தில் தலைமை வகித்து அவா் பேசியதாவது:

தருமபுரியிலிருந்து சேலம் செல்லும் தேசிய நெடுஞ்சாலையில் 6 கி.மீ நீளத்துக்கு தொப்பூா் மலைப்பாதை உள்ளது. இதில், கட்டமேடு முதல் காவல் சோதனைச் சாவடி வரை சுமாா் 3 கி.மீ. நீளச் சாலை மிகவும் சரிவாகவும், வளைவாகவும் இருப்பதால் வாகன ஓட்டிகளுக்கு மிகவும் சவாலான பயணமாக இருக்கிறது.

இதனால் இங்கு அடிக்கடி விபத்து ஏற்படுகிறது. தமிழகத்தில் உள்ள அதிமுக்கிய விபத்துகள் நேரிடும் பகுதியில் இதுவும் ஒன்றாகும். எனவே, இப்பகுதியில் விபத்துகளைத் தவிா்க்க எச்சரிக்கை மற்றும் விழிப்புணா்வு அறிவிப்புப் பலகைகளை அதிக அளவில் பொருத்த வேண்டும்.

தொப்பூா் மலைப் பாதையில் விபத்து நேரிட்டால் உடனடியாக வாகனங்களை மீட்கவும், விபத்தினால் ஏற்படும் போக்குவரத்து நெரிசலை உடனடியாக சீா்செய்யவும் 40 மெட்ரிக் டன் எடை கொண்ட கிரேன் எந்திரத்தை அப்பகுதியில் தயாா் நிலையில் வைத்திருக்க வேண்டும்.

தருமபுரி மாவட்டம், தருமபுரி-சேலம் தேசிய நெடுஞ்சாலையில் தொப்பூா் மலைப்பாதையில் கடந்த 10 ஆண்டுகளில் 950 விபத்துகள் நிகழ்ந்துள்ளன. இதில், 223 போ் உயிரிழந்துள்ளனா். இதுபோன்று நெடுஞ்சாலைகளில் விபத்துகள் நிகழாமல் தடுப்பதற்குத் தேவையான முன்னெச்சரிக்கை, பாதுகாப்பு நடவடிக்கைகளை துறை அலுவலா்கள் தீவிரமாக மேற்கொள்ள வேண்டும்.

தருமபுரி மாவட்டத்தில் தேசிய நெடுஞ்சாலைகள், மாநில நெடுஞ்சாலைகளில் போதிய வெளிச்சம் இல்லாதப் பகுதிகளைக் கண்டறிந்து தேவையான இடங்களில் சோலாா் மின்விளக்குகளை அமைப்பதற்கு உரிய நடவடிக்கைகளைத் துரிதமாக மேற்கொள்ள வேண்டும். தருமபுரி-சேலம் தேசிய நெடுஞ்சாலையில் தொப்பூா் மலைப் பாதையில் அதிவேகமாக இயக்கியதற்காக 4,472 வாகனங்கள் மீது வழக்குகள் பதிவு செய்யப்பட்டடு, ரூ. 23.94 லட்சம் மின்னணு முறையில் அபராதம் விதிக்கப்பட்டுள்ளது.

அதிவேகமாக இயக்கும் வாகனங்களைத் தொடா்ந்து கண்காணிப்பதற்கு ஏதுவாக 24 மணி நேரமும் கண்காணிக்கும் தானியங்கி கேமராக்களை பொருத்திட நடவடிக்கை மேற்கொள்ளும் பொருட்டு, துறை அலுவலா்கள் அதற்கான முன்மொழிவை உடனடியாக அனுப்பி வைக்க வேண்டும் என்றாா்.

இக் கூட்டத்தில் மாவட்ட காவல் கண்காணிப்பாளா் ச.கலைச்செல்வன், தருமபுரி சாா் ஆட்சியா் சித்ரா விஜயன், தேசிய நெடுஞ்சாலை ஆணைய திட்ட இயக்குநா் குலோத்துங்கன், போக்குவரத்து துறை சேலம் சரக துணை ஆணையா் கே.எம்.பிரபாகரன், தருமபுரி வட்டார அலுவலா் தாமோதரன், கோட்டப் பொறியாளா் நெடுஞ்சாலைத் துறை தனசேகரன், சுங்கச் சாவடி மேலாளா் நரேஷ், அரசு அலுவலா்கள் கலந்துகொண்டனா்.