பஞ்சப்பள்ளி சின்னாறு நீர்த்தேக்கத்திலிருந்து பாசனத்துக்கு தண்ணீர் திறப்பு

தருமபுரி மாவட்டம், பாலக்கோடு வட்டம், பஞ்சப்பள்ளி சின்னாறு நீர்த்தேக்கத்திலிருந்து புதன்கிழமை வேளாண் மற்றும் உழவர் நலத்துறை அமைச்சர் எம்.ஆர்.கே. பன்னீர்செல்வம், பாசனத்துக்கு தண்ணீர் திறந்து வைத்தார்.

சின்னாறு அணையில் நடைபெற்ற நிகழ்ச்சிக்கு மாவட்ட ஆட்சியர் ச.திவ்யதர்சினி தலைமை வகித்தார். தருமபுரி மக்களவை உறுப்பினர் டிஎன்வி எஸ்.செந்தில்குமார் முன்னிலை வகித்தார்.

இதில் பாசனத்துக்கு அணையில் இருந்து தண்ணீர் திறந்து வைத்து அமைச்சர் எம்.ஆர்.கே. பன்னீர்செல்வம் பேசியது:

தருமபுரி மாவட்டம், பாலக்கோடு வட்டம், பஞ்சப்பள்ளி கிராமத்தில் உள்ள சின்னாறு நீர்த்தேக்கத்திலிருந்து 2021-22 ஆம் ஆண்டிற்கு பாசனத்திற்காக தண்ணீர் திறந்து விடப்பட்டுள்ளது. இதில் பழைய ஆயக்கட்டு ஐந்து ஏரிகளுக்கும், புதிய ஆயக்கட்டு பாசன பகுதிகளுக்கு டிச.29-ஆம்  தேதி முதல் வினாடிக்கு 25 கன அடி வீதம் முதல் 64 நாள்களுக்கு 6 நாள்களுக்கு தண்ணீர் தொடர்ந்து விட்டும் 2 நாள்களுக்கு நிறுத்தியும் அடுத்த 30 நாள்களுக்கு 8 நாள்களுக்கு தொடர்ந்து விட்டும் 2 நாள்களுக்கு நிறுத்தியும் மீதமுள்ள 46 நாள்களுக்கு தொடர்ந்து தண்ணீர் திறந்து விடப்படும்.

இதன் மூலம் பழைய ஆயக்கட்டு பரப்பு 2626 ஏக்கர் மற்றும் புதிய ஆயக்கட்டு பரப்பு 1874 ஏக்கர் மொத்தம் 4500 ஏக்கர் நிலம் பாசனவசதி பெறும். பஞ்சப்பள்ளி, பெரியானூர், போடிகுட்டப்பள்ளி, அத்திமுட்லு மாரண்டஅள்ளி, கொலசனஅள்ளி,
பி.செட்டிஅள்ளி, ஜெர்த்தலான், பாலக்கோடு, குஜ்ஜரஅள்ளி, எர்ரனஅள்ளி, பேளாரஅள்ளி, சாமனூர் ஆகிய கிராமங்கள் பாசன‌ வசதி பெறும்.

எனவே விவசாய பொதுமக்கள் நீர்வள ஆதாரத் துறையினருடன்
ஒத்துழைத்து தண்ணீரை சிக்கனமாக பயன்படுத்தி அதிக விளைச்சல் பெறுமாறு கேட்டுக்கொள்ளப்படுகிறது என்றார்.