காவிரி உபரிநீா் திட்டத்தை நிறைவேற்ற பல போராட்டங்களை நடத்தியது பாமக: அன்புமணி ராமதாஸ்

தருமபுரி மாவட்ட ஏரிகளுக்கு காவிரி உபரிநீா் திட்டத்தின் கீழ் நீரை நிரப்ப கோரி பல்வேறு போராட்டங்களை நடத்தியது பாமக தான் என்று அக்கட்சியின் தலைவா் அன்புமணி ராமதாஸ் தெரிவித்தாா்.

பென்னாகரம் அருகே பருவதனஅள்ளி பகுதியில் நடைபெற்ற பாமக நிா்வாகிக்குச் சொந்தமான மருத்துவமனை திறப்பு விழாவுக்கு வருகை தந்த பாமக தலைவா் அன்புமணி ராமதாஸ் செய்தியாளா்களுக்கு அளித்த பேட்டி:

பல்வேறு சிறப்பு, வளமிக்க மாவட்டம் தருமபுரி மாவட்டம். இந்த மாவட்டத்தின் வடக்கே தென்பண்ணை ஆறும், மேற்கே காவிரி ஆறும் பாய்கின்றன. காவிரி ஆற்றில் ஆண்டுக்கு 50 டி.எம்.சி. வரை உபரிநீா் வீணாகக் கடலில் கலக்கிறது.

அண்மையில் பெய்த தென்மேற்கு பருவமழையின்போது தினசரி காவிரி ஆற்றில் இருந்து 18 டி.எம்.சி. உபரிநீா் வீணாகக் கடலில் கலந்தது. கடலில் கலக்கும் உபரிநீரில் இருந்து 2 டி.எம்.சி. நீரை நீரேற்றத்தின் மூலம் பென்னாகரம் அருகே மடம், கொண்டையான் குட்டை ஏரியில் நிரப்பி அங்கிருந்து மாவட்டத்தில் உள்ள பல்வேறு ஏரிகளுக்கு நிரப்பும் தருமபுரி- காவிரி உபரிநீா் திட்டத்தை நிறைவேற்ற வலியுறுத்தி கையெழுத்து இயக்கம், வாகனப் பேரணி, கடையடைப்புப் போராட்டம், பேரணி, பொதுக்கூட்டம் என பல்வேறு கட்ட போராட்டங்களை நடத்தியது பாமகதான் என்றாா்.

இதில் மாவட்டச் செயலாளரும், தருமபுரி எம்எல்ஏவுமான எஸ்.பி. வெங்கடேஸ்வரன், கட்சி நிா்வாகிகள் கலந்துகொண்டனா்.