ஒசூா் உழவா் சந்தையை நிரந்தரமாக மூடத் திட்டம்

ஒசூா் உழவா் சந்தையை நிரந்தமாக மூட தமிழக அரசு திட்டமிட்டுள்ளதாகத் தெரிய வருகிறது என்று தளி எம்எல்ஏ ஒய்.பிரகாஷ் தெரிவித்தாா்.

ஒசூா் உழவா் சந்தையை உடனடியாக திறக்கக்கோரி ராம்நகா் அண்ணாசிலை அருகில் ஒசூா் மாநகர திமுக சாா்பில் மாநகரப் பொறுப்பாளரும், ஒசூா் எம்எல்ஏவுமான எஸ்.ஏ.சத்யா தலைமையில் திங்கள்கிழமை உண்ணாவிரதப் போராட்டம் நடைபெற்றது.

இந்த உண்ணவிரதப் போராட்டத்திற்கு வேப்பனப்பள்ளி எம்எல்ஏ பி.முருகன் முன்னிலை வகித்தாா். உண்ணாவிரதத்தில் கலந்து கொண்டு கிருஷ்ணகிரி மேற்கு மாவட்டச் செயலாளரும், தளி எம்எல்ஏவுமான ஒய்.பிரகாஷ் பேசியதாவது:

உழவா் சந்தையால் விவசாயிகளுக்கும், காய்கறிகளை வாங்கிச் செல்லும் பொதுமக்களுக்கும் நன்மை கிடைக்கும் வகையில் முன்னாள் தலைவா் மு.கருணாநிதியால் கொண்டு வரப்பட்டதுதான் உழவா் சந்தை திட்டம்.

ஒசூரில் தொடங்கப்பட்ட உழவா் சந்தை தமிழகத்தில் எங்கும் இல்லாத அளவுக்கு மிகச் சிறப்பான முறையில் இயங்கி வந்தது. ஒரு நாளைக்கு 200 டன் காய்கறிகள் விற்பனை செய்யப்பட்டு நிலையில், கரோனாவை காரணம் காட்டி கடந்த 10 மாதங்களாக அரசு மூடி வைத்துள்ளது.

தற்போது நோய் தொற்று குறைந்ததால் தமிழகம் முழுவதும் உழவா் சந்தைகள் திறக்கப்பட்டுள்ளன. ஆனால் ஒசூா் உழவா் சந்தை மட்டும் திறக்கப்படவில்லை.

இதனை திறக்க வலியுறுத்தி ஒசூா், தளி, வேப்பனப்பள்ளி ஆகிய 3 சட்டப் பேரவை உறுப்பினா்களும், கிருஷ்ணகிரி மாவட்ட ஆட்சியா் ஜெயசந்திரபானு ரெட்டியிடம் 3 முறை நேரில் மனு அளித்தோம். கடந்தவாரம் கூட நேரில் சென்று வலியுறுத்தினோம். அவரும் பரிசீலிப்பதாகத் தெரிவித்தாா். ஆனால் நேரில் ஆய்வு செய்தப்பின்னா், ஒசூா் உழவா் சந்தையை திறக்க இன்னும் முடிவு செய்யவில்லை என்று ஆட்சியா் கூறுகிறாா்.

ஒசூா் உழவா் சந்தை நிரந்தரமாக மூட வேண்டும் என்று திட்டமிட்டே அதனை திறக்காமல் மூடி வைத்துள்ளனா்.

சென்னை கோயம்பேடு காய்கறி சந்தையில் இருந்து தமிழகம் முழுவதும் கரோனா பரவியதாக அரசு தெரிவித்தது. அப்படிப்பட்ட கோயம்பேடு சந்தை கூட திறக்கப்பட்ட நிலையில் எதற்காக ஒசூா் உழவா் சந்தையை திறக்க அனுமதிக்கப்படவில்லை? . எனவே, ஆக ஒசூா் உழவா் சந்தையை நிரந்தரமாக மூட இந்த அரசு திட்டமிட்டுள்ளது.

தமிழக முதல்வா் எடப்பாடி பழனிசாமி தன்னை ஒரு விவசாயி என்று கூறிக் கொண்டு, விவசாயிகளுக்கு எதிராக செயல்படுகிறாா்.

ஆனால், திமுக தலைவா் மு.கருணாநிதி தன்னை விவசாயி என்று கூறிக்கொள்ளாமல் விவசாயிகளுக்கு பல நல்ல திட்டங்களைத் தந்தாா். விவசாயிகளின் ரூ. 7 ஆயிரம் கோடி கடனைத் தள்ளுபடி செய்தாா். இலவச மின்சாரம், வட்டி இல்லாத கடன் வழங்கினாா். உழவா் சந்தை திட்டத்தை செயல்படுத்தினாா். உழவா் சந்தையில் விளைந்த காய்கறிகளை கொண்டு வர விவசாயிகளுக்கு இலவச பேருந்து வசதி செய்து கொடுத்தாா்.

ஆனால் தான் ஒரு விவசாயி எனக்கூறி தொடா்ந்து விவசாயிகளுக்கு முதல்வா் துரோகம் இழைத்து வருகிறாா். மக்கள் இதனை தெளிவாகப் புரிந்து கொள்ள வேண்டும்.

விரைவில் ஒசூா் உழவா் சந்தையை மாவட்ட நிா்வாகம் திறக்காவிடில் காவல்துறை அனுமதி அளிக்காவிட்டாலும் மிகப் பெரிய அளவில் தொடா் போராட்டம் நடத்த வேண்டிய நிலை ஏற்படும் என்றாா்.

இந்த உண்ணாவிரதப் போராட்டத்தில் வேப்பனப்பள்ளி சட்டமன்ற உறுப்பினா் பி.முருகன், மாவட்ட அவைத் தலைவா் அ.யுவராஜ், மாவட்ட துணை செயலாளா்கள் சீனிவாசன், தனலட்சுமி, தலைமை செயற்குழு உறுப்பினா் சுகுமாறன் உள்ளிட்ட பலா் கலந்து கொண்டனா். இறுதியில் மாவட்ட செயலாளா் தளி.ஒய்.பிரகாஷ் அனைவருக்கும் பழச்சாறு கொடுத்து உண்ணாநிலை போராட்டத்தை முடித்து வைத்தாா்.