கருணை அடிப்படையில் வேலை: சாலைப் பணியாளர்கள் கோரிக்கை

இறந்த சாலைப் பணியாளர்கள் குடும்பங்களுக்கு கருணை அடிப்படையில் வாரிசு வேலை வழங்க வேண்டும் எனக் கோரிக்கை விடுக்கப்பட்டது.
தமிழ்நாடு நெடுஞ்சாலைத் துறை சாலைப் பணியாளர்கள் சங்க மாவட்ட பொதுக் குழுக் கூட்டம் சங்க மாவட்டத் தலைவர் ஜெயக்குமரன் தலைமையில் நாமக்கல்லில் ஞாயிற்றுக்கிழமை நடைபெற்றது.
மாவட்ட இணைச் செயலர் செல்வக்குமார், துணைத் தலைவர் அன்புச்செழியன் முன்னிலை வகித்தனர். மாநிலத் தலைவர் சண்முகராஜா, செயலர் ராஜமாணிக்கம், துணைத் தலைவர் ராஜேந்திரன், மாவட்டத் துணைத் தலைவர் தனபால் உள்ளிட்டோர் பேசினர். கூட்டத்தில் நிறைவேற்றப்பட்ட தீர்மானங்கள்:
சாலைப் பணியாளர்களின் 41 மாத பணி நீக்க காலத்தைப் பணிக் காலமாக அறிவிக்க வேண்டும். இறந்த சாலைப் பணியாளர்கள் 200-க்கும் மேற்பட்ட குடும்பங்களுக்கு வாரிசு வேலை வழங்க வேண்டும். 7-ஆவது ஊதியக் குழுவின் நிலுவைத்தொகை முழுவதையும் வழங்கிட வேண்டும். சீறுடை, சலவைப்படி, விபத்துப்படி வழங்கிடவேண்டும்.
நாமக்கல், ஈரோடு மாவட்ட பகுதிகளில் மக்களை காப்பதற்காக வெள்ளத்தடுப்பு உள்ளிட்ட மக்களை பாதுகாக்கும் பணிகளில் சாலைப் பணியாளர்கள் அர்ப்பணிப்போடு பணியாற்றுவது, கேரள மாநில வெள்ள நிவாரணத்துக்கு சாலைப் பணியாளர்கள் அனைவரும் ஒரு நாள் ஊதியத்தை வழங்குவது, மாவட்ட இணைச் செயலர் ராஜூ நன்றி கூறினார். கூட்டத்தில் சாலைப் பணியாளர்கள் சங்க நிர்வாகிகள் மற்றும் உறுப்பினர்கள் கலந்து கொண்டனர்.