ஆளுநருக்கு எதிரான போராட்டம்: திமுகவினருக்கு பிணை கோரி நீதிமன்றத்தில் மனுதாக்கல்

ஆளுநருக்கு எதிரான போராட்டத்தில் கைது செய்யப்பட்ட திமுகவினருக்கு பிணை கோரி நாமக்கல் நீதிமன்றத்தில் திங்கள்கிழமை மனு தாக்கல் செய்யப்பட்டது. இந்த மனு மீதான விசாரணை வரும் புதன்கிழமை நடைபெறுகிறது.
 தமிழக ஆளுநர் பன்வாரிலால் புரோஹித் கடந்த 22ஆம் தேதி நாமக்கல் மாவட்டத்தில் சுற்றுப்பயணம் செய்தார். அவரது ஆய்வுக்கு எதிர்ப்புத் தெரிவித்து நாமக்கல்லில் திமுகவினர் கருப்புக்கொடி ஏந்தி போராட்டத்தில் ஈடுபட்டனர். இந்தப் போராட்டத்தில் ஈடுபட்ட கிழக்கு மாவட்ட திமுக பொறுப்பாளர் செ.காந்திசெல்வன், மேற்கு மாவட்ட திமுக செயலர் கே.எஸ்.மூர்த்தி எம்எல்ஏ உள்பட மொத்தம் 192 பேரை போலீஸார் கைது செய்து சேலம் சிறையில் அடைத்தனர்.
 அவர்களை பிணையில் விடுவிக்கக் கோரி திமுக வழக்குரைஞர் அணியினர் நாமக்கல் மாவட்ட முதன்மை நீதிமன்றத்தில் நீதிபதி கே.எச்.இளவழகனிடம் மனு தாக்கல் செய்தனர். இந்த மனு புதன்கிழமை விசாரணைக்கு எடுத்து கொள்ளப்பட இருப்பதாக நீதிமன்ற வட்டாரத்தில் தெரிவிக்கப்பட்டது.