ரயில்வே பள்ளிகளை தொடர்ந்து நடத்த உத்தரவு: ரயில் பாதுகாப்புக் குழு உறுப்பினர் வரவேற்பு

தமிழகம் முழுவதும் மூடப்படுவதாக அறிவிக்கப்பட்ட ரயில்வே பள்ளிகளை மீண்டும் திறக்கும்படி, குழந்தைகளுக்கான கட்டாயக் கல்வி உரிமை சட்ட ஆணையம் உத்தரவிட்டுள்ளது. இந்த அறிவிப்புக்கு அகில இந்திய ரயில் பாதுகாப்புக் குழு உறுப்பினரான என்.கே.பி.ரவிக்குமார் வரவேற்புத் தெரிவித்துள்ளார்.
தெற்கு ரயில்வே நிர்வாகத்தின் கட்டுப்பாட்டில் தமிழகம் மற்றும் கேரளத்தில் 9 ரயில்வே பள்ளிகள் இயங்கி வருகின்றன. இந்த ரயில்வே பள்ளிகளை இந்த கல்வி ஆண்டுடன் மூட உள்ளதாக தெற்கு ரயில்வே நிர்வாகம் அறிவித்தது.
இந்த நிலையில், தமிழகத்தில் இயங்கும் ரயில்வே பள்ளிகளை மூடும் முடிவைக் கைவிட வேண்டும் என அகில இந்திய ரயில் பாதுகாப்புக் குழு உறுப்பினர் என்.கே.பி.ரவிக்குமார் தெற்கு ரயில்வே பொது மேலாளருக்கு கோரிக்கை மனு அனுப்பியிருந்தார்.
இந்நிலையில் தமிழகம் முழுவதும் மூடப்படுவதாக அறிவிக்கப்பட்ட ரயில்வே பள்ளிகளை மீண்டும் திறக்கும்படி, குழந்தைகளுக்கான கட்டாயக் கல்வி உரிமை சட்ட ஆணையம் அண்மையில் உத்தரவிட்டுள்ளது.
இந்த உத்தரவுக்கு நன்றி தெரிவித்துள்ள ரவிக்குமார், ரயில்வே பள்ளிகளை தொடர்ந்து நல்ல முறையில் நடத்திட ரயில்வே நிர்வாகம் நடவடிக்கையெடுக்க வேண்டும் எனக் கேட்டுக் கொண்டார்.