மு.க.அழகிரியை பாஜகவில் இணைக்கும் முயற்சியில் ஈடுபட்டுள்ளேன்: கே.பி.ராமலிங்கம்

மு.க. அழகிரி தனிக்கட்சி தொடங்கப்போவதாகக் கூறப்படுகிறது. ஆனால் அவரை பாஜகவில் இணைக்கும் முயற்சியில் நான் ஈடுபட்டுள்ளேன் என்று முன்னாள் மாநிலங்களை உறுப்பினா் கே.பி.ராமலிங்கம் தெரிவித்தாா்.

ராசிபுரத்தில் பாஜக சாா்பில் முன்னாள் பிரதமா் வாஜ்பாய் பிறந்த தினவிழா வெள்ளிக்கிழமை கொண்டாடப்பட்டது. இதில் நகர தலைவா் மணிகண்டன் தலைமை வகித்தாா். ராசிபுரம் பழைய பேருந்து நிலையம் முன்பு நடந்த விழாவில் இயற்கை நீா்வளப் பாதுகாப்பு சங்க நிறுவனரும், பாஜகவில் அண்மையில் இணைந்த முன்னாள் எம்.பி.யுமான கே.பி.ராமலிங்கம் பங்கேற்று, வாஜ்பாய் படத்துக்கு மாலை அணிவித்து இனிப்புகளை வழங்கினாா். பின்னா் அவா் செய்தியாளா்களிடம் கூறியதாவது:

வாஜ்பாய் பிறந்த தினம் பாஜக சாா்பில் நல்லாட்சி தினமாக நாடு முழுவதும் கொண்டாடப்பட்டு வருகிறது. வாஜ்பாய் கொண்டு வந்த திட்டங்கள் இந்திய நாட்டின் எதிா்காலத்துக்கு உன்னதமான சூழ்நிலையை உருவாக்கும் திட்டங்களாக அமைந்துள்ளன. இந்தியா முழுவதும் தங்க நாற்கரச் சாலை திட்டம் என்ற பெயரில் காஷ்மீா் முதல் கன்னியாகுமரி வரை நான்கு வழிச்சாலை திட்டங்கள் கொண்டுவரப்பட்டன. அப்போதும் விவசாயிகள் தங்கள் நிலங்கள் பாதிகப்படுவதாகப் போராட்டங்களை நடத்தினா்.

ஆனால் 20 ஆண்டுகளைக் கடந்த பின் அந்தத் திட்டங்கள் எவ்வளவு முக்கியமான திட்டங்களாக அமைந்துள்ளது என்பதைப் பாா்க்கிறோம். அதே போலத்தான் தற்போது வேளாண் திருத்தச் சட்டங்களுக்கு எதிா்ப்பு இருந்தாலும் எதிா்காலத்தில் விவசாயிகளுக்கு பலன் தரும் திட்டங்களாக அமையும்.

பொதுவாக பாஜக கொண்டு வரும் திட்டங்கள் உடனடியாக பலன் தரும் திட்டங்கள் அல்ல. மாறாக நீண்ட எதிா்காலத்தோடு கொண்டுவரப்டும் திட்டங்கள். அப்படிபட்ட திட்டங்களைக் கொண்டுவர காரணமாக இருந்த வாஜ்பாய் பிறந்த தினத்தை கொண்டாடுவதில் பாஜக பெருமை கொள்கிறது.

தற்போது திமுக நடத்திவரும் கிராமசபைக் கூட்டங்கள் தேவையற்றவை. இது தவறான நடைமுறை. இது மக்கள் மத்தியில் குழப்பங்களை உருவாக்கும். அரசும், அதிகாரிகளும்தான் கிராமசபைக் கூட்டங்களை நடத்த வேண்டும். திமுகவுக்கு தோ்தல் பயம் வந்து விட்டது. இனி நாம் ஆட்சிக்கு வரப்போவதில்லை என்ற நிலைக்கு திமுக வந்து விட்டது. இதனால் ஏதாவது செய்து பாா்க்கலாம் என்று ஏதேதோ செய்து வருகின்றனா். மு.க.அழகிரி தனி கட்சி துவங்குவதாக கூறப்படுகிறது. ஆனால் அவரை பாஜகவில் இணைக்கும் முயற்சியில் நான் ஈடுபட்டுள்ளேன் என்றாா். இவ்விழாவில் மாநில பொதுக்குழு உறுப்பினா் கதிரேசன், நகர பாஜக பொதுச்செயலா்கள் குமாா், சக்திவேல், செயலா்கள் பி.சுதாகா், சம்பத், நகர மகளிரணி துணைத்தலைவா் திவ்யா உள்ளிட்டோா் பங்கேற்றனா்.